Թվում էր, թե Վրաստանում իշխանափոխությունից հետո հայերի նկատմամբ հետապնդումները և բռնի գործողությունները վերացել են, բայց նախօրեին հայտնի դարձավ, որ ձերբակալվել է քաղաքացիական ակտիվիստ, նախկին քաղբանտարկյալ Վահագն Չախալյանի եղբայրը՝ Արմեն Չախալյանը:
Վ. Չախալյանը իրեն ձերբակալելու մեջ մեղադրում էր նախագահ Սաակաշվիլիին և նրա ռեժիմը, և ընդհանրապես՝ ջավախքահայերի մեծ մասը հենց Մ. Սաակաշվիլիին էին մեղադրում իրենց նկատմամբ իրականացված քաղաքական հետապնդումների համար, իսկ թե այժմ որն էր Վ. Չախալյանի եղբոր ձերբակալության պատճառը, փորձեցինք ճշտել ՀՀԿ-ական պատգամավոր, «Ջավախք» հայրենակցական միության նախագահ Շիրակ Թորոսյանից, ում մուտքը Վրաստան արգելվել էր նույն Սաակաշվիլիի կողմից:
Մեր հարցին՝ ինչո՞ւ են ձերբակալել Արմեն Չախալյանին, Շիրակ Թորոսյանը պատասխանեց. «Նախնական տեղեկություններով՝ եղել է ծեծկռտուք, որին մասնակցել է Արմեն Չախալյանը»:
Մեր հաջորդ հարցին՝ չկա՞ այստեղ քաղաքական ենթատեքստ, Շ. Թորոսյանն ասաց. «Ես իմ միտքը շարադրեցի, եղել է խմբակային ծեծկռտուք, որին մասնակցել է Արմեն Չախալյանը և մնացածի հետ միասին ձերբակալվել»:
Հիշեցնենք, որ Շիրակ Թորոսյանի մուտքը Վրաստան թույլատրելի դարձավ հոկտեմբերին Վրաստանում կայացած խորհրդարանական ընտրություններից հետո:
