ԵՄ մի քանի անդամ-երկրներ ԱՄՆ հատուկ ծառայություններին հսկայական ծավալի գաղտնի (այդ թվում՝ անձնական բնույթի) տեղեկություններ են փոխանցում համացանցի օգտատերերի վերաբերյալ: Այս մասին հաղորդում է բրիտանական The Guardian թերթը:
Պարբերականը վկայակոչում է ԱՄՆ Ազգային անվտանգության գործակալության (NSA) նախկին աշխատակից Ուեյն Մեդսենին:
Մեդսենի խոսքերով, NSA-ը գաղտնի կերպով տվյալներ է ստանում համացանցի եվրոպացի օգտատերերի մասին ոչ միայն Մեծ Բրիտանիայի, այլ նաև Դանիայի, Նիդեռլանդների, Ֆրանսիայի, Գերմանիայի, Իսպանիայի և Իտալիայի հատուկ ծառայություններից:
Մեդսենը նաև զայրացած է եվրոպացի քաղաքական գործիչների գործողություններից, ովքեր իբր թե ցնցված են ամերիկյան և բրիտանական հատուկ ծառայությունների համագործակցության մասին լուրերից, և դա այն դեպքում, երբ իրենք ևս այս առումով գաղտնի պայամանավորվածություն ունեն ԱՄՆ-ի հետ: «Ես չեմ կարող հասկանալ՝ ինչպե՞ս Անգելա Մերկելը համարձակվեց բացատրություն պահանջել Օբամայից և Մեծ Բրիտանիայից, երբ Գերմանիան ինքը հենց նման կերպ է գործում»,- ասել է Մեդսենը:
Նշենք, որ շաբաթ լույս կիրակի գիշերը The Guardian թերթը իր կայքից հանել է այս նյութը: Դրա փոխարեն, նույն հասցեում տեղադրված է հետևյալ նախադասությունը. «Այս հոդվածը հանված է կայքից՝ կապված ընթացող հետաքննության հետ»:
