ԱՄՆ նախագահի թեկնածու Հիլարի Քլինթոնը հայտարարել է, որ ահաբեկչությունը Ստամբուլի օդանավակայանում ուղիղ ապացույցն է այն բանի, որ ԱՄՆ-ը «չպետք է նահանջի» ահաբեկչության դեմ պայքարում: Այս մասին հայտնում է Reuters-ը:
«Ստամբուլում այսօրվա հարձակումը միայն ամրապնդում է մեր վճռականությունը՝ դիմակայելու ահաբեկչության և արմատական ջիհադի ուժերին ամբողջ աշխարհում: Մենք պետք է խորացնենք համագործակցությունը Մերձավոր Արևելքում և Եվրոպայում դաշնակիցների և գործընկերների հետ՝ այդ սպառնալիքի դեմ պայքարելու համար»,- նշել է նախկին պետքարտուղարը:
Գործակալության հաղորդմամբ՝ ԱՄՆ նախագահի թեկնածու Դոնալդ Թրամփը հայտարարել է, որ «ահաբեկչական սպառնալիքը երբեք ավելի շատ չի եղել»:
«Մեր թշնամիները դաժան և անգութ են ու կանեն ամեն ինչ՝ ոչնչացնելու համար նրանց, ովքեր չեն ենթարկվի իրենց կամքին: Մենք պետք է միջոցներ ձեռնարկենք Ամերիկան ահաբեկիչներից պաշտպանելու համար, և անենք ամեն ինչ մեր ուժերի սահմաններում, որ Ամերիկան անվտանգ լինի»,- հավելել է նա:
Այս գիշեր հաղորդվում էր, որ իրար հետևից երկու պայթյուն է գրանցվել Ստամբուլի Աթաթուրքի անվան օդանավակայանում` արտաքին չվերթների տերմինալում: Պայթյուններին զուգահեռ լսվել է նաև 30-40 կրակոց:
Թուրքիայի արդարադատության նախարար Բեքիր Բոզդաղը հայտարարել է, որ այդ պահի դրությամբ պայթյունների ու կրակոցների հետևանքով զոհվել է 10 և վիրավորվել 50 մարդ:
