Ինչպես գիտենք, Թուրքիայի նախագահ Թայիփ Էրդողանը երեկ ներողություն խնդրեց Ռուսաստանի նախագահ Վլադիմիր Պուտինից խոցված «Սու-24» ինքնաթիռի համար, և կարծես ռուս-թուրքական հարաբերությունները կարգավորվելու միտում ունեն:
«Առաջին լրատվական»-ի հարցին՝ այս ամենը ինչքանո՞վ է մտահոգում Հայաստանին, քանի որ, ինչպես գիտենք պատմությունից, թուրք-ռուսական հարաբերությունների մերձեցումից միշտ վնասվել են Հայաստանի շահերը, ԱԺ ՀՀԿ խմբակցության պատգամավոր Արտակ Զաքարյանը պատասխանեց. «Ես չէի ասի, որ այդ հարաբերությունների մերձեցումից միշտ ի վնաս Հայաստանի քայլեր են կատարվել»:
Նրա խոսքով՝ պատմության մեջ հաճախ են ռուս-թուրքական հարաբերությունները կարգավորվել, սակայն հետո ինչ-որ պահի կրկին հակասության մեջ մտել. «Այնուամենայնիվ, այս իրավիճակը տարածաշրջանի համար կարող է բերել նոր իրադարձություն: Կարծում եմ՝ ավելի շատ տնտեսական նշանակության զարգացումներ կարող են տեղի ունենալ: Բայց այսօր դեռ վաղ է վերլուծություններ անել»:
Այնուհանդերձ՝ Արտակ Զաքարյանը չի կարծում, որ այդ հարաբերությունները շատ արագ կկարգավորվեն և կջերմանան, քանի որ, բացի խոցված ինքնաթիռից ու զոհված օդաչուից, նրանց հարաբերություններում կան բազում այլ խնդիրներ. «Ուստի ես հակված չեմ կարծելու, որ վաղը չէ մյուս օրը Կրեմլում կնստեն ու կգծեն այդ ջերմ հարաբերությունների ճանապարհային քարտեզը, որովհետև կարծում եմ՝ այս հարաբերությունների խաթարումից ավելի շատ տուժում է Թուրքիան, քան Ռուսաստանը: Բայց նաև կարծում եմ՝ Էրդողանի կողմից այդ պաշտոնական «ներողությունը» կարող է որոշակի գործողությունների իրականացման հիմք դառնալ»:
Արտակ Զաքարյանի համոզմամբ՝ ռուս-թուրքական հարաբերությունների լավ կամ վատ լինելուց «մեր անվտանգության նկատմամբ սպառնալիքները չեն փոխվում»:
Մանրամասները՝ տեսանյութում:
