Հայաստանի զինդատախազ Գևորգ Կոստանյանը Սյունիքի նախկին մարզպետ Սուրիկ Խաչատրյանի տան մոտ տեղի ունեցած արյունալի միջադեպից հետո ծանր վնասվածք ստացած Արտակ Բուդաղյանին առայժմ գործով տուժող չճանաչելը պայմանավորում է «բազմաթիվ քննչական գործողությունների անհրաժեշտությամբ»: «Ազատություն» ռադիոկայանի հետ զրույցում զինդատախազը քննության արդյունքում չի բացառել որևէ սցենար:
Նախօրեին հայտնի է դարձել, որ պաշտպանության նախարարության քննչական վարչությունը հետաձգել է Արտակ Բուդաղյանին տուժող ճանաչելու պահանջի վերաբերյալ որոշման կայացումը: Բուդաղյանի եղբայրը` հունիսի 1-ի երեկոյան Խաչատրյանի տան մոտ հնչած կրակոցներից տեղում մահացած Գորիսի քաղաքապետի նախկին թեկնածու, 43-ամյա գործարար Ավետիք Բուդաղյանը քրեական գործով արդեն իսկ ճանաչվել է որպես տուժող:
«Արտակ Բուդաղյանին որպես տուժող ճանաչելու միջնորդությունը հետաձգվել է: Որպեսզի որոշվի, որ անձը հանցագործության արդյունքում տուժել է, այսինքն իրեն պատճառվել է ֆիզիկական, նյութական կամ բարոյական վնաս (իսկ այս դեպքում մասնավորապես), դեռևս անհրաժեշտ են բազմաթիվ քննչական, դատավարական գործողություններ: Համապատասխան փորձաքննության արդյունքների և այլ ապացույցների համադրության արդյունքում միայն հնարավոր կլինի հստակեցնել գործին մասնակից յուրաքանչյուր անձի դերը, նշանակությունը, և միայն այդ ժամանակ հնարավոր կլինի իրավական գնահատական տալ այդ գործողություններին»,- ասել է Գևորգ Կոստանյանը:
Դեպքի առթիվ, հիշեցնենք, երկու անձի` Սուրիկ Խաչատրյանի 19-ամյա որդուն և 25-ամյա թիկնապահին Քրեական օրենսգրքի երեք հոդվածներով՝ սպանության, դիտավորությամբ առողջությանը ծանր վնաս պատճառելու և ապօրինի զենք-զինամթերք կրելու մեղադրանքներ են առաջադրված: Տիգրան Խաչատրյանն ու Զարզանդ Նիկողոսյանը «Նուբարաշեն» քրեակատարողական հիմնարկում են:
Զինդատախազը հայտնի տեսանյութի տարածումից հետո հայտարարեց, որ Սուրիկ Խաչատրյանի տան ուղղությամբ տեղի է ունեցել զինված հարձակում կոնկրետ անձի կողմից, ապա փոխհրաձգություն, իսկ շարժառիթները այժմ ճշտվում են, ըստ երևույթին նկատի ունենալով Բուդաղյաններին: Ուստի երեկ «Ազատություն» ռադիոկայանը փորձել է Գևորգ Կոստանյանից ճշտել, հնարավո՞ր է անհրաժեշտ քննչական գործողությունների արդյունքում Արտակ Բուդաղյանը ընդգրկվի որպես մեղադրյալ. – «Ամեն ինչ հնարավոր է: Իրավական գնահատականներին կանդրադառնանք հաջորդիվ»,- ասաց զինդատախազը:
Գևորգ Կոստանյանը չի պատասխանել այն հարցին, թե «զինված հարձակման» վերաբերյալ իր կարծիքն արդյո՞ք շարունակում է մնալ ուժի մեջ: Իսկ մեր այն դիտարկմանը, թե Բուդաղյանների պաշտպանական կողմը քննադատում է իրեն` նման կարծիք հնչեցնելու համար, զինդատախազը հակադարձել է. – «Ես հարգում եմ ցանկացած կարծիք: Իրավական առումով ցանկացած քննադատության պատասխանները իրենք կտեսնեն քրեական գործում, համապատասխան որոշումների մեջ»:
Բուդաղյանների փաստաբան Հայկ Ալումյանը «Ազատություն» ռադիոկայանի հետ զրույցում գործի իրական հանգամանքների տեսանկյունից անհնար է համարել Արտակ Բուդաղյանին որպես մեղադրյալ ներգրավելը` միաժամանակ հավելելով. – «Բայց հաշվի առնելով զինդատախազի ի սկզբանե դրսևորած այդ միակողմանի մոտեցումը` ես հիմա ոչինչ չեմ բացառում: Ես դա հնարավոր եմ համարում ոչ թե ելնելով գործի իրական հանգամանքներից, այլ հաշվի առնելով զինդատախազի տենդենցիոզ մոտեցումը, որն առաջին օրվանից դրսևորվում է: Գործի հանգամանքներից ելնելով բացառված է, որ Արտակ Բուդաղյանը ներգրավվի որպես մեղադրյալ, ինքը դեպքի հենց հաջորդ օրվանից պիտի ճանաչված լիներ որպես տուժող: Ես վախենում եմ, որ քրեական գործի նյութերը հիմա համապատասխանեցվում են զինդատախազի առաջին օրվա հայտարարություններին»:
