«Բուռն քննարկումների ականատես եղանք, որոնցում մեր խորհրդարանականները փայլեցին եղած-չեղած տաղանդներով: Զգացվում է, որ աշխարհին համընթաց հայ երեսփոխանները զարգացնում են կրեատիվի զինանոցը և ժամանակակից շոուբիզնեսից հետ չմնալու հայտեր են ներկայացնում»,- ԱԺ այսօրվա արտահերթ նիստում իր ելույթն այս խոսքերով սկսեց ՀԱԿ խմբակցության ղեկավար Լևոն Զուրաբյանը:
«Վերջերս մի նոր թրենդ է նկատվում՝ քաղաքական գործիչները փորձում են իրենց դրսևորել կատակերգության, պարոդիայի ժանրերում՝ հիմնականում ոգեշնչման աղբյուր գտնելով հումորի տեղական արտադրության «գլուխգործոցներից»՝ փորձելով մեջբերումներ անել ու համեմել հին սովետական ֆիլմերով: Գեղարվեստական բնագավառում ինքնադրսևորում փնտրող բոլոր այս քաղաքական գործիչներին մաղթում եմ ստեղծագործական հաջողություններ, ինչը կարևոր է այն ժամանակ, երբ քաղաքական դժվարին ասպարեզում այլևս ձեռքբերումներ չկան»,- ակնարկներով լի իր խոսքն այսպես ամփոփեց ՀԱԿ խմբակցության ղեկավարը:
Անդրադառնալով նիստում քննարկվող բուն թեմային՝ Լ. Զուրաբյանը հայտարարեց, որ ՀԱԿ-ը բանակցություններ է վարել միջազգային դոնոր կազմակերպությունների հետ և, ըստ էության, 8,5 մլն եվրոյի հարցը լուծված է. «3 մլն եվրոն էլ տալու է Կառավարությունը, և արդյունքում պակասում է 4-5 մլն եվրոն: Պակասող գումարի հարցը, եթե կառավարությունը չի լուծում, ապա մենք հանգիստ կարող ենք եզրակացնել, որ կառավարությունը դրժում է 4+4+4 ձևաչափով ձեռք բերված համաձայնությունը»:
Մանրամասները՝ տեսանյութում: