Այսօր առավոտյան մոտ 300 մարդ էր հավաքվել Սոֆիայի խորհրդարանի մոտ: Facebook սոցցանցի միջոցով կազմակերպված«Սուրճ՝ խորհրդարանի մոտ» հակակառավարական ակցիան անցկացվել է երկրորդ օրը: Այս մասին հայտնում է ITAR-TASS-ը:
Ցուցարարները խորհրդարանի շենքի ուղղությամբ լոլիկներ են նետել՝ հրաժարական պահանջելով, սակայն ոստիկանությունը որևէ գործողություն չի ձեռնարկել իրավախախտումների դադարեցման համար:
Օրենսդիր մարմնի շենքի շուրջ նախկինի պես մետաղական ցանկապատեր են դրված: Իշխանություները որոշել են ընդլայնել անվտանգության հրապարակը: Խորհրդարանին հարակից փողոցով տրանսպորտի շարժը դադարեցվել է:
Սոֆիայի բնակիչների դժգոհությունն է հարուցել հունիսի 14-ին Ազգային անվտանգության պետական ծառայության ղեկավարի պաշտոնում «Շարժում հանուն իրավունքի և ազատության» կուսակցությունից Դելիան Պեևսկու նշանակումը: Հունիսի 19-ին խորհրդարանի պատգամավորները կողմ են քվեարկել նրա նշանակման մասին որոշումը չեղյալ հայտարարելուն: Չնայած դրան, բողոքի ցույցերը շարունակվում են արդեն երկու շաբաթ և սկսել են հակակառավարական բնույթ կրել:
