Լոռու մարզխորհրդի երեկվա նիստում ներկայացվեց մարզի համայնքներում 2013 թ. հունիսի 1-ի դրությամբ սեփական եկամուտների հավաքագրման ընթացքի վերաբերյալ հաշվետվություն: 5 ամսվա կտրվածքով մարզի համայնքների եկամուտների հավաքագրումը կազմել է 94.5 %, կամ նախատեսված 2201.6 մլն դրամի դիմաց հավաքագրվել է 2081.2 մլն դրամ: 01.06.13 թ. դրությամբ համայնքների սեփական եկամուտները կազմել են 577.0 մլն դրամ կամ 90.6 %` նախորդ տարվա 507.8 մլն դրամի կամ 74.0 %-ի դիմաց: Նախորդ տարվա համեմատ՝ ավել է հավաքագրվել 69.2 մլն դրամ:
Վարչական բյուջեի եկամուտների հավաքագրումը կատարվել է 96.8 %-ով` նախորդ տարվա 89.5 %-ի դիմաց: Չնայած սրան՝ մարզի 28 համայնքների սեփական եկամուտների հավաքագրումը, նախորդ տարվա համեմատ, նվազել է: 16 համայնքների ընթացիկ տարվա հավաքագրման ցուցանիշը կազմել է 60 տոկոսից ցածր, մինչև 50 տոկոս հավաքագրում ունեն 6 համայնք:
Գույքահարկի՝ նախատեսված 189.5 մլն դրամի դիմաց հավաքագրվել է 181.5 մլն դրամ կամ 95.8 %, 2012-ի համեմատությամբ՝ ավել է հավաքագրվել 23.2 մլն դրամ: Մինչդեռ 31 համայնքներ նվազում ունեն նախորդ տարվա համեմատ: 20 համայնքներում ընթացիկ պլանի կատարողականը կազմել է 70 %-ից ցածր, որոնցից 11 համայնք առավել ցածր` մինչև 50 % կատարողական ունի:
Հողի հարկի` նախատեսված 155.8 մլն դրամի դիմաց հավաքագրվել է 136.9 մլն դրամ կամ 87.9 %: 2012 թ. համեմատ՝ ավել է հավաքագրվել 31.4 մլն դրամ, մինչդեռ 36 համայնքներ նվազում ունեն նախորդ տարվա համեմատ: 26 համայնքների մոտ ընթացիկ պլանի կատարողականը կազմել է 70 %-ից ցածր, որոնցից 6 համայնք առավել ցածր` մինչև 40 % հավաքագրում ունի:
Տեղական տուրքերի հավաքագրման մակարդակը կազմել է 105.1 % կամ 50.7 մլն դրամի դիմաց հավաքագրվել է 53.3 մլն դրամ: Փաստացի հավաքագրումն աճել է 3,1 մլն դրամով: Մինչդեռ նախորդ տարվա համեմատ՝ հավաքագրման նվազում ունեն 28 համայնքներ: 35 համայնքների մոտ ընթացիկ պլանի նկատմամբ կատարողականը կազմել է 60 %-ից ցածր, որոնցից առավել ցածր` մինչև 30 % հավաքագրում ունեն 15 համայնքներ, ընդ որում 7 համայնքներ ընդհանրապես մուտք չունեն: Հոբարձի, Միխայլովկա, Սարալանջ համայնքներում, ի տարբերություն նախորդ տարվա, գանձումներ չեն եղել:
Պետական տուրքի գանձումը կազմել է 103.5 %, փաստացի հավաքագրումը նախորդ տարվա համեմատ նվազել է 650.6 հազար դրամով:
Հողի և գույքի վարձակալության վճարների` կանխատեսված 89.0 մլն դրամի դիմաց հավաքագրվել է 75.4 մլն դրամ կամ 84.8 %, նախորդ տարվա համեմատ ավել է հավաքագրվել 2.2 մլն դրամ: Գույքի վարձակալության հավաքագրման գումարները նվազել են Թումանյանի տարածաշրջանում 17, Գուգարքի՝ 11, Սպիտակի՝ 9, Ստեփանավանի՝ 5, Տաշիրի՝ 7 համայնքներում: Վարձակալական գումարների հավաքագրման մինչև 20 % ցուցանիշ ունեն 6 համայնքներ, գանձում չունեն Ապավեն և Հարթագյուղ համայնքները:
