ԱԺ ԲՀԿ-ական պատգամավոր Միքայել Մելքումյանը հանդես է եկել «Շրջանառության հարկի մասին» ՀՀ օրենքում լրացում կատարելու մասին» օրենսդրական նախաձեռնությամբ, որին կառավարությունը վաղվա նիստում բացասական եզրակացություն է տալու: Մելքումյանն առաջարկում է սահմանել, որ առևտրական (առքուվաճառքի) գործունեություն իրականացնող, շրջանառության հարկ վճարող համարվող տնտեսվարող սուբյեկտները շրջանառության հարկը հաշվարկեն ոչ թե գործող` 3.5 տոկոս դրույքաչափով, այլ`
1) 3 տոկոս դրույքաչափով, եթե առևտրական գործունեության ընթացքում ձեռք բերված ապրանքների առնվազն հիսուն տոկոսը հիմնավորված է փաստաթղթերով,
2) 2.5 տոկոս դրույքաչափով, եթե առևտրական գործունեության ընթացքում ապրանքների ձեռք բերումն ամբողջությամբ հիմնավորված է փաստաթղթերով:
Մելքումյանը իր նախաձեռնությունը հիմնավորել էր գործարքների փաստաթղթավորման գործընթացը խթանելու և առևտրական գործունեություն իրականացնող տնտեսվարող սուբյեկտների հարկային բեռը նվազեցնելու անհրաժեշտությամբ: Կառավարությունը իր բացասական եզրակացության մեջ նշել է, որ տնտեսվարող սուբյեկտները, չփաստաթղթավորելով իրենց գոր-ծարքները, կրում են ապրանքների գնի 50, 100 կամ 200 տոկոսի չափով տուգանք վճարելու ռիսկը, հետևաբար ապրանքների գնի 0.5 կամ 1 տոկոսի չափով հարկի գումարի նվազեցումը չի կարող գործարքների փաստաթղթավորման խթան հանդիսանալ:
«Մյուս կողմից՝ հատկանշական է այն, որ խնդիրն առավելապես պայմանավորված է ոչ թե շրջանառության հարկ վճարողների կողմից փաստաթղթեր չպահանջելով, այլ խոշոր մատակարարների կողմից փաստաթղթեր չտրամադրելով: Հետևաբար նախագծի ընդունման դեպքում կարող են ստեղծվել հարկման անհավասար պայմաններ, քանի որ շրջանառության հարկ վճարող համարվող որոշ տնտեսվարող սուբյեկտներ կարող են փաստաթղթավորել իրենց ձեռքբերումները և դրանով իսկ օգտվել շրջանառության հարկի նվազեցված դրույքաչափ կիրառելու հնարավորությունից, իսկ որոշ հարկ վճարողներ այդպես էլ չեն կարողանա փաստաթղթավորել իրենց ձեռքբերումները, քանի որ նրանց մատակարարները չեն տրամադրում համապատասխան փաստաթղթեր»,- ասվում է կառավարության եզրակացությունում:
Ավելին, ըստ կառավարության` նախագծի ընդունումը կստեղծի լուրջ վարչարարական խնդիրներ, քանի որ կատարված ընդհանուր ձեռքբերումները և հատկապես դրա՝ փաստաթղթերով չհիմնավորված մասի տեսակարար կշիռը որոշելը լուրջ դժվարություններ են ստեղծելու և՛ հարկ վճարողների, և՛ հարկային մարմինների համար:
«Անհասկանալի է, թե ինչպես է որոշվելու ընդհանուր ձեռքբերումների կառուցվածքում փաստաթղթերով հիմնավորված ձեռքբերումների տեսակարար կշիռը, եթե ընդհանուր ձեռքբերումների մեջ կարող են լինել նաև փաստաթղթերով չհիմնավորված ձեռքբերումներ, որոնց մասով ո՛չ ապրանքների քանակը և ո՛չ էլ գները հնարավոր չէ որոշել»,- ասված է կառավարության եզրակացությունում:
