Կոտայքի մարզի Աղավնաձոր գյուղից հունիսի 12-ին դատախազության դիմաց իրենց բողոքը բարձրացրած Դանիելյանների ընտանիքն այսօր կրկին եկել էր դատախազության շենքի դիմաց: Այս անգամ ևս նրանք դատախազությունից պահանջում էին արդարացի դատավճիռ:
Հիշեցնենք, որ ընտանիքի անդամներից Մկրտիչ Դանիելյանը 2008 թվականի հոկտեմբերի 25-ին Աղավնաձորից Հրազդան գնալու ճանապարհին «Մերսեդես-Բենց Ե 320» մակնիշի ավտոմեքենայով վթարի է ենթարկվել՝ բախվելով «Վազ 21-06» մակնիշի մեկ այլ մեքենայի, ինչի հետևանքով զոհվել են 2 մարդ, վիրավորվել ևս երկուսը՝ Մկրտիչ Դանիելյանը և «Մերսեդեսի» տերը՝ Գագիկ Հովսեփյանը:
Դատարանն արդարացրել է մեքենայի իրավական տիրոջը՝ Գագիկ Հովսեփյանին, իսկ երկու օր առաջ Մկրտիչ Դանիելյանը դատարանի կողմից ճանաչվել է մեղավոր և դատապարտվել 7 տարվա ազատազրկման:
Ընտանիքի անդամները այս որոշումը համարում են անօրինական, ինչի գլխավոր մեղավորը, նրանց կարծիքով, դատախազ Հակոբ Մարտիրոսյանն է:
Դանիելյաններն այսօր ցանկանում էին հանդիպել ՀՀ գլխավոր դատախազ Աղվան Հովսեփյանին, սակայն սկզբում նրանց թույլ չտվեցին: Ընտանիքը հուսահատված «արդարություն» գոռալով փակեց ճանապարհը՝ այս կերպ փորձելով հանդիպել գլխավոր դատախազի հետ: Մի քանի րոպե երթևեկությունը խափանելուց հետո մեղադրյալ Մկրտիչ Դանիելյանին, եղբորը՝ Մակիչ Դանիելյանին, և ընտանիքի ազգական Վահան Դանիելյանին թույլ տվեցին հանդիպել Աղվան Հովսեփյանին:
Գլխավոր դատախազը խոստացավ վերաքննիչ դատարան դիմելուց հետո նշանակել այլ դատախազ և անցկացնել լուրջ քննություն: Մինչ այդ ոչինչ հնարավոր չէ անել:
Մկրտիչի քույրը՝ Լուսինե Դանիելյանը, «Առաջին լրատվական»-ի հետ զրույցում ասաց, որ սա հերթական խաբեությունն է, ուզում են «փափուկ բարձ» դնել գլխների տակ. «Մենք կգնանք մինչև նախագահական, մինչև Եվրախորհուրդ: Ի՞նչ է, ուզում են վրաներս բենզին լցնենք, վառվե՞նք, որ հավատան՝ անմեղ է մեր եղբայրը»:
Մանրամասները դիտեք տեսանյութում:
