«Թափանցիկությունը պաշտպանության կառավարման ոլորտում» կլոր սեղանի շրջանակներում քննարկվեց «Բարեվարքության ամրապնդումը պաշտպանության ոլորտում» թեման: ԶՈՒԺՎ տնօրենի տեղակալ Ֆիլիպ Պլուրինին իր ելույթում անդրադարձավ պաշտպանության ոլորտի կառավարմանը ներսից: Նրա դիտարկմամբ՝ պաշտպանության քաղաքականության ընթացակարգերի տեսանկյունից պետք է դիտարկել, թե ինչպես բացառել կոռուպցիան Զինված ուժերում: Հինգ տարի առաջ բարեվարքության կայացման ՆԱՏՕ-ի նախաձեռնությանը միացել է նաև Հայաստանի պաշտպանության նախարարությունը:
Բուլղարիայի պաշտպանության նախկին նախարար Թոդոր Թագարևը, որը, ի դեպ, չորս շաբաթ առաջ է պաշտոնաթող եղել, պաշտպանության ոլորտում կոռուպցիայի դեմ պայքարին անդրադառնալով՝ նշեց, որ շատերը կարծում են, թե կոռուպցիան դռների հետևում որևէ ծառայության դիմաց ինչ-որ բան վճարելն է, բայց կոռուպցիան դրսևորվում է մարդկանց պաշտոնների նշանակումների մեջ:
«Կոռուպցիան պետական պաշտոնը մասնավոր շահի համար օգտագործելն է, ինչը պարտադիր չէ, որ անձնական շահ լինի, բայց այն կարող է լինել հօգուտ ընտանիքի կամ կուսակցության, խմբերի կամ այլ սուբյեկտի»,- ասաց նա:
Ինչպիսի՞ն է կոռուպցիայի նկատմամբ վերաբերմունքը. ըստ Թոդոր Թագարևի՝ շատ երկրներում այն մոտեցումն է իշխում, թե կոռուպցիան այն յուղն է, որ աշխատեցնում է բարդ շարժիչը, այսինքն՝ եթե ինչ-որ փոքր նվեր չտաս, քեզ լավ չեն սպասարկի: Մեկ այլ ընկալմամբ՝ կոռուպցիան բարոյապես և օրինապես անընդունելի է և պատժելի օրենքով:
Կոռուպցիայի դեմ ՄԱԿ-ի կոնվենցիայով կոռուպցիան որակվում է որպես հանցագործություն, ինչը, ըստ բանախոսի, շատ կարևոր է:
Նա անդրադարձավ կոռուպցիայի ազդեցությանը պաշտպանության ոլորտում. «Նախևառաջ՝ այն վատնում է միջոցները, խաթարում բարոյահոգեբանական մթնոլորտը թե զինվորների, թե սպայական կազմի շրջանում»,- ասաց նա:
Կոռուպցիան պաշտպանության համակարգում խաթարում է բարոյական մթնոլորտը, ինչը իր հերթին վտանգում է զինվորների կյանքը: Կոռուպցիան ոչ միան ներսից է խաթարում համակարգը, այլ նաև համակարգից դուրս ունի ազդեցություն: Նա նշեց, որ կոռուպցիան լուսաբանվում է մամուլում, և երբ մարդիկ տեղեկանում են ԶՈւ կոռումպացված լինելու մասին, դրանից հետո ուղղակի դադարում են վստահել Զինված ուժերին:
«2009-ին մի շարք հոդվածներ տպագրվեցին Բուլղարիայի ԶՈւ կոռուպցիայի դեպքերի մասին, և հաջորդ տարի 42 տոկոսով կրճատվեց ռազմական բյուջեն, և որևէ մեկը ոտքի չկանգնեց և չպաշտպանեց ՊՆ-ին, քանի որ կար արդեն վերաբերմունք, որ ՊՆ-ն մսխում և վատ է տնօրինում փողերը»,- ասաց նա:
Ըստ նրա՝ կոռուպցիայից խուսափելու համար պետք է ռազմավարություն մշակել: «Չեմ կարծում՝ հնարավոր է ունենալ մեկ միասնական մոդել՝ անտեսելով իրավական կազմակերպչական, մշակութային տեքստերը»,- ասաց նա: Անհրաժեշտ է ՊՆ-ում գնումները դարձնել թափանցիկ:
«Կոռուպցիա նշանակում է թաքուն փողի փոխանակում լավության դիմաց: Դրա միակ և լավագույն ձևը պատասխանատվության ենթարկելը չէ. ներկայում բոլորն ընդունում են, որ կոռուպցիան ոչ միայն բարոյական, այլ նաև տնտեսական անվտանգության խնդիր է»,- ասաց նա:
Պետք է ստեղծել այնպիսի միջավայր, որտեղ կոռուպցիան քիչ տեղ կունենա:
