Այսօր մեկնարկել է «Հյուսիս-հարավ ճանապարհային միջանցքի ներդրումային ծրագրի» Թալին-Գյումրի ճանապարհի Թալին-Լանջիկ և Լանջիկ-Գյումրի ճանապարհահատվածների շինարարությունը:
ՀՀ Տրանսպորտի և կապի նախարար Գագիկ Բեգլարյանը լրագրողների հետ զրույցում փորձեց հավաստիացնել, որ 2018-ի ավարտին կունենանք առաջին կարգի ճանապարհահատված: «Ամեն ինչ արվում է, որ մինչև Սև ծով ունենանք առաջին կարգի ճանապարհ, այսօր բանակցում ենք նաև Վրաստանի Հանրապետության հետ, որպեսզի Բավրայից մինչև Սև ծով ճանապարհի շինարարության համար նրանք ևս գումարներ տրամադրեն»:
Անդրադառնալով առաջին տրանշի ժամանակ բարձրաձայնված չարաշահումների մասին հրապարակումների վերաբերյալ հարցին, Բեգլարյանը նշեց, որ իրականացվում է երկկողմ վերահսկողություն, ինչի պարագայում չարաշահումներ չեն լինի:
Աշխատանքներն իրականացվելու են ենթակապալառուների միջոցով: «Տեղեկություններ կան, որ աշխատանքներն իրականացնող ենթակապալառուն Ձեզ և Հովիկ Աբրահամյանին պատկանող ընկերություն է»,- «Առաջին լրատվական»- ի այս դիտարկմանը Գ. Բեգլարյանն այսպես արձագանքեց. «Այդ ասողին խնդրում եմ ասեք, թող հոգեբուժարան գնա, որովհետև այս կարգի հայտարարություներվ… էդ հոգեբուժարանների ենթակա մարդկանց հայտարարությունները ես չեմ մեկնաբանում: Նաև ասեմ, որ այս կազմակերպությունն ունենալու է 100-ից ավելի ենթակապալառու»:
Մանրամասները՝ տեսանյութում:
