Գրոհայինների վերահսկողության տակ գտնվող Հալեպ քաղաքն աղետի գոտու է վերածվել և հումանիտար օգնության կարիք ունի: Նման հայտարարությամբ հանդես է եկել քաղաքապետ Ահմադ Ազիզը «Փարիզյեն» թերթին տված հարցազրույցում:
Ինչպես նշել է քաղաքագլուխը՝ արևմտյան երկրների վերաբերմունքը Սիրիայի նկատմամբ վերջին երկու տարվա ընթացքում խիստ հիասթափեցրել է Հալեպի բնակիչներին:
«Շատ խոստումներ տրվեցին, բայց դրանք չեն իրականացվել: Մենք, մասնավորապես, առանց թռիչքների գոտու հույս ունեինք, որը ծառայելու էր բնակչության պաշտպանության համար: Բայց՝ իզուր: Ոմանք խոսում էին «կարմիր գծի մասին», որը հատված կհամարվեր քիմիական զենքի կիրառման դեպքում: Այն կիրառվեց, բայց ոչինչ տեղի չունեցավ: Սիրիացիները հպարտություն ունեն, մենք չենք պատրաստվում ողորմություն խնդրել: Ես ուղղակի դիմում եմ մեզ հումանիտար օգնություն տրամադրելու կոչով, որովհետև մեզ բառացիորեն ամեն-ինչ չի հերիքում»,- ասել է նա:
Ազիզի խոսքերով՝ ռազմական գործողությունների հետևանքով լուրջ վնասներ են կրել քաղաքային ենթակառուցվածքները:
