Ռուսական RIA Novosti լրատվական գործակալության փոխանցմամբ՝ Ասիական զարգացման բանկը չի հրաժարվում ադրբեջանական «Շահ Դենիզ» հանքավայրում գազի ու կոնդենսատի արդյունահանումն ընդլայնելու նախագծի վարկավորման պլաններից: Այդ մասին այսօր հայտարարել է Ադրբեջանում Ասիական զարգացման բանկի ներկայացուցչության ղեկավար Նարիման Մանապբեկովը:
Նախատեսվում է, որ Ասիական զարգացման բանկի ներդրումային պլանով «Շահ Դենիզի» մշակման երկրորդ փուլի համար հատկացնել 1 միլիարդ 505 միլիոն դոլար:
Նախորդ շաբաթ Ասիական զարգացման բանկը հայտարարեց, որ վարկի հաստատումն օգոստոսից հետաձգվում է սեպտեմբեր: Ավելի ուշ այդ տեղեկատվությունը հեռացվեց բանկի կայքից:
Մանապբեկովի խոսքով՝ քննարկումները ներկայումս ընթացքի մեջ են: «Շահ Դենիզի» պաշարները գնահատվում են 1.2 տրիլիոն խորանարդ մետր: «Շահ Դենիզ 2» նախագծի շրջանակներում նախատեսվում է գազի տարեկան արդյունահանումը ներկայիս 9 միլիարդ խորանարդ մետրից հասցնել մինչև 16 միլիարդ խորանարդ մետրի: «Շահ Դենիզ 2»-ի նախագիծը գնահատվում է 25 միլիարդ դոլար:
