GALLUP International association-ի հայաստանյան ներկայացուցչության տնօրեն Արամ Նավասարդյանն այսօր լրագրողներին ներկայացրեց «Եվրասիական զարգացման բանկի» պատվերով 2012-ին Խորհրդային Միության նախկին երկրներում 13.000 հոգու միջև իրականացված հարցման արդյունքները:
Ներառվել են հետևյալ հարցերը՝ ո՞ր երկրի ապրանքներն եք հիմնականում գնում, որտե՞ղ եք նախընտրում ապրել, որտե՞ղ եք ցանկանում ներդրումներ ունենալ, որտե՞ղ եք լինում, որտե՞ղ եք ուզում հանգստանալ, ո՞ր երկրի մշակույթն է հետաքրքիր, ո՞վ է մեզ ընկեր, ով՝ թշնամի և այլն:
Հայաստանում հարցվածների 28 տոկոսը, պատասխանելով՝ ո՞ր երկրների ապրանքները կցանկանաք գնել և որի՞ն եք ավելի շատ վստահում. նշել է նախկին Խորհրդային Միության երկրների արտադրանքը: 46 տոկոսը նշել է որ կուզենար ներդրումներ անել Ռուսաստանում, 36 տոկոսը՝ եվրոպական երկրներում:
Հայաստանում հարցվածների 61տոկոսը նշել է, որ դրական է վերաբերվում Մաքսային միությանը, 26 տոկոսը նշել է, որ անտարբեր է, այդ հարցն իրեն չի հետաքրքրում, և միայն չորս տոկոսն է բացասական վերաբերվում։ Վրաստանում հարցվածների 30 տոկոսն է դրական վերաբերում, այսինքն մեզ մոտ ցուցանիշը կրկնակի է:
Հարցմանը մասնակցած հայաստանցիների 41 տոկոսը նշել է, որ կուզենար սովորել եվրոպական երկրներում, 18 տոկոսը՝ Ռուսաստանում:
Հայաստանում հարցվածների 90 տոկոսը նշել է, որ մեզ բարեկամ երկիր համարում է Ռուսաստանը, իսկ թշնամի երկիր 94 տոկոսը համարում է Ադրբեջանը: Հարցվածների 88 տոկոսը ռազմական դաշնակից համարում է Ռուսաստանը: Վրաստանում հարցվածների 78 տոկոսը վտանգ է զգում Ռուսաստանից:
Քաղաքագետ Սերգեյ Շաքարյանցի համար սա զարմանալի ցուցանիշ չէ: Նա օրինակ բերեց, երբ 97-ին մեկ միլիոնից ավելի ստորագրություն հավաքվեց, որ Հայաստանը միանա Ռուսաստանին. «Մարդը ստորագրություն է տվել, որ չի ուզում անկախ լինել»,- ասաց նա:
Սերգեյ Շաքարյանցի խոսքերով՝ բավական օբյեկտիվ ցուցանիշներ են, քանի որ մեր բնակչության մեծամասնությունն անկախության վերականգնումից հետո՝ քսան տարուց ավելի, ազատություններից չի օգտվել, լավ կյանք չի տեսել. ինչո՞ւ պետք է նա վստահի վաղվա օրվան, դրա համար մարդը գնում է այն երկրներ, որոնց վստահում է:
Ս. Շաքարյանցը նշեց, որ կասկածում է, թե հնարավորություններ ունենալու դեպքում մարդիկ կգնային Եվրոպա, քանի որ մարդիկ կգնան այն երկրներ, որտեղ քաղաքացիության, ինչպես նաև լեզվի խնդիր չի լինի:
«Դրա համար նստում են ավտոբուս, գնում Մինվոդի, դրանից հետո տեսնում որտեղ գնալ»,- ասաց նա՝ հավելելով, որ մեր բնակչությունը չի մեկնում ԵՄ երկրներ՝ տգետ չէ, տեսնում է, որ Եվրամիությունը խորապես ճգնաժամ է ապրում, ինչպես Հունաստանում, Կիպրոսում:
Ինչ վերաբերում է այն հարցին, թե ում հետ համաձայնագիր կնքել՝ Մաքսային միության, թե ԵՄ-ի, Սերգեյ Շաքարյանցն ասաց, որ կնախընտրեր դեռևս ոչ մեկի հետ չմերձենալ, շարունակել մնալ նույն կարգավիճակում:
