ԴԱԻՇ-ի դեմ կոալիցիայի արշավները լուրջ հաջողությունների են հասնում: Զինյալները Իրաքում կորցրել են իրենց կողմից վերահսկվող տարածքի մոտ 50%-ը, Սիրիայում՝ 20%-ը, նրանց կողմից վերահսկվող թուրք-սիրիական սահմանի երկարությունը կրճատվել է մինչև 19 կիլոմետր, սպանվել է ԴԱԻՇ-ի մոտ 100 առաջնորդ: Լրագրողներին այսպիսի տվյալներ է ներկայացրել գլոբալ կոալիցիայի գծով ԱՄՆ նախագահի հատուկ ներկայացուցիչ Գրեկ Մակգերկը՝ հայտնում է RIA Novosti-ն:
«Սա վերջին ժամանակների ամենամեծ ահաբեկչական մարտահրավերն է, ինչին մենք երբևէ բախվել ենք: Մենք դիմակայել ենք ողջ աշխարհում մոտ 40 հազար զինյալների… Այժմ նրանք կորցրել են մոտ 50% Իրաքում և 20%՝ Սիրիայում, և շարունակում են տարածքներ կորցնել»,- հայտնել է նա:
«Դժվար է ասել՝ այժմ քանի զինյալ է կռվում ԴԱԻՇ-ում, սակայն մեր տվյալներով՝ մոտ 19-25 հազար, և այդ թիվը շարունակվում է կրճատվել: Նրանց կրճատել ենք գրեթե կիսով չափ»,- ավելացրել է խոսնակը՝ հավելելով, որ ԴԱԻՇ-ը լուրջ խնդիրներ ունի գումարի հետ կապված:
Նա նաև նշել է, որ զինյալների կողմից վերահսկվող թուրք-սիրիական սահմանի երկարությունը կրճատվել է մինչև 19 կիլոմետր՝ ընդգծելով Թուրքիայի կատարած լավ աշխատանքը: Նրա խոսքով, սակայն, անհրաժեշտ է ամբողջովին վերադարձնել սահմանային վերահսկողությունը, քանի որ հենց այդ սահմանով են գրոհայինները ներթափանցոմ Թուրքիա, իսկ հետագայում՝ Եվրոպա՝ ահաբեկչություններ կատարելու նպատակով:
