1999թ. բացված Աբովյան քաղաքի «Նարեկ» ծերանոցն օգնության կարիք ունի։ Օգնության խնդրանքով օրերս «Սաթենիկ» բարեգործական-հասարակական կազմակերպության նախագահ, «Նարեկ» ծերանոցի նախագահ Ֆրիդոն Միքայելյանը և ծերանոցի տնօրեն Շողիկ Միքայելյանը հանդիպել էին լրագրողների հետ և ներկայացրել ծերանոցի խնդիրները՝ ունեն 37 ծեր, ոմանք անկողնային, ծերանոցը պահվում է ծերերի թոշակներով և ծերանոցի այցելուների դրամական աջակցությամբ: Ամուսինները նշել էին, որ եթե գտնվի բարեգործական մի կազմակերպություն, որն ամիսը 300-400 հազար փոխանցի, իրենց կբավականացնի բոլոր խնդիրների լուծման համար։
Ուշագրավն այն էր, որ նրանք զարմանքով էին արձանագրել այն փաստը, որ նախկինում ԲՀԿ առաջնորդ Գագիկ Ծառուկյանն աջակցում էր ծերանոցին, մինչդեռ արդեն երկու տարի է, գրեթե չի աջակցում:
«Առաջին լրատվական»-ը փորձեց պարզել, թե ինչու է դադարեցվել ֆինանսավորումը կամ դադարեցվել է, թե ոչ: ԲՀԿ առաջնորդ Գագիկ Ծառուկյանի մամլո խոսնակ Իվետա Տոնոյանը մեզ հետ զրույցում ասաց, որ ծերանոցին տրվող ֆինանսավորումը որևէ ժամանակահատվածում չի դադարեցվել և այդ մասին նախօրեին տնօրեն Շողիկ Միքայելյանն իր հետ զրույցում ասել ու փաստել է, քանի որ կան փոխանցումների բոլոր փաստաթղթերը, փոխանցումները կանոնավոր կերպով կատարվել են:
«Ավելին ասեմ՝ նախօրեին պարոն Ծառուկյանի հանձնարարականով այցելել եմ ծերանոց, զրուցել եմ իրենց հետ: Պարոն Ծառուկյանը հանձնարարել է, որ ֆինանսավորումը մեծանա, ու երեկ էլ կանխիկ գումար է փոխանցվել ընթացիկ հոգսերը հոգալու համար, ու այսուհետ յուրաքանչյուր ամիս ֆինանսավորումը մեծացած չափով շարունակելու են ստանալ: Ուղղակի այս ընթացքում ծերերի թվաքանակն ավելացել է, որի մասին պարոն Ծառուկյանը տեղյակ չի եղել, և ֆինանսավորումը չի ավելացել, բայց ընթացիկ ֆինանսավորում յուրաքանչյուր ամիս իրականացվել է»,- ասաց Իվետա Տոնոյանը:
«Առաջին լրատվական»-ի հետ զրույցում ծերանոցի նախագահ Ֆրիդոն Միքայելյանը նշեց, որ իրականում եղել է ֆինանսավորում, բայց չի բավարարել, քանի որ ծերերը նախկին 18-ից ավելացել են 34-ի: «Դրա համար թյուրիմացություն էր առաջացել, Ծառուկյանի կողմից 200 հազար դրամ գումար է տրվել, ուրախ ենք, որ ֆինանսավորման չափը մեծացավ, ամեն ամիս այդքանը մեզ բավարարում է»,- ասաց Ֆիրդոն Միքայելյանը:
