Դոհայում տեղի ունեցած «Սիրիայի բարեկամներ» խմբի հանդիպման ժամանակ ձեռք բերված պայմանավորվածությունները կօգնեն աջակցել Սիրիայի ընդդիմությանը: Այս մասին հաղորդում է France Press-ը: Այդ առումով վստահություն է հայտնել Ֆրանսիայի նախագահ Ֆրանսուա Օլանդը:
Նախագահը նշել է, որ «Սիրիայի բարեկամների» անդամները որոշել են քայլեր ձեռնարկել համաժողովի իրականացման համար, որը թույլ կտար գտնել հակամարտության քաղաքական լուծումը: Օլանդը մեջբերել է նաև ՄԱԿ-ի տվյալները, որոնց համաձայն՝ հակամարտությունն արդեն խլել է առնվազն 93 հազար մարդու կյանք:
Նշենք, որ Կատար ժամանած Ֆրանսիայի նախագահը բանակցություններ կվարի այդ երկրի էմիր շեյխ Համադ Էլ–Թանիի հետ:
Ավելի վաղ Դոհայում տեղի էր ունեցել «Սիրիայի բարեկամնր» խմբի մեջ մտնող 11 պետությունների արտգործնախարարների հանդիպումը: Նիստի ժամանակ որոշում է ընդունվել անհապաղ օգնություն հատկացնել Սիրիայի ընդդիմադիր ուժերին: Մասնավորապես, նախարարները պայմանավորվել են «անհապաղ այնտեղ ուղարկել անհրաժեշտ նյութեր և սարքավորումներ, որպեսզի ըննդիմությունը կարողանա դիմակայել ռեժիմի և նրա դաշնակիցների դաժան հարձակումներին, ինչպես նաև պաշտպանի խաղաղ քաղաքացիներին»:
Կոմյունիկեում նշվում է, որ այս խմբի մեջ մտնող յուրաքանչյուր պետություն ինքը պետք է որոշի՝ ինչ կերպ աջակցել Սիրիայի ապստամբներին:
