Ֆիզիկոս Վիգեն Դավիդյանը Նիկոսիայում մարդկանց ուշադրությունն է գրավել իր «Վիգենէքսպլորատորիում» գիտական ցուցադրությամբ: Այս մասին հայտնում է aravot.am-ը՝ հղում անելով «Եվրոնյուզ» լրատվականին:
«Cyprus Community Media Centre» նախագիծը հյուրընկալել է Դավիդյանին՝ ֆիզիկայի փորձեր ցույց տալու:
Ցուցադրության նպատակը առօրյա կյանքում օգտագործվող բարդ գիտական երևույթները կրթական մոտեցմամբ և զվարճանքի միջոցով ներկայացնելն է՝ ցույց տալու, որ բոլորը կարող են հասկանալ գիտական հասկացությունները:
«Փորձերի իմաստն է կրթական մոտեցումները գործնականում ցույց տալն է: Շատերը գիտեն տեսությունը, բայց գաղափար չունեն, թե ինչ է այն իրական կյանքում: Ես ցույց եմ տալիս իրադարձությունների հակառակ հաջորդականությունը: Տեսությունից սկսելու ու դեպի գործնական գնալու փոխարեն, սկսում եմ գիտության գործնական մասից», – ասել է Դավիդյանը:
Վիգեն Դավիդյանը նախկինում աշխատում էր Իլինոյսի համալսարանում: Կիպրոս տեղափոխվելուց հետո, նա հասկացել է, որ այնտեղ անհնար է հետազոտության ոլորտում աշխատանք գտնել և այժմ որոշել է հայկական հացի փուռ բացել, որը նաև գիտական ուղղվածություն կունենա. «Իմ գիտական ցուցադրություններն այդտեղ կանենք, որպեսզի գրավենք երեխաներին, ինչպես նաև կսովորեցնենք նրանց ուտելիքի գիտական մասը, քանի որ հաց թխելը մեծ առընչություն ունի գիտության հետ», – ասել է նա՝ նշելով, որ ուզում է իր երեխաներին մեծացնել այնպիսի միջավայրում, որտեղ գիտությունը զվարճանքի պես մի բան է:
