ԱԺ «Ժառանգություն» խմբակցության պատգամավոր Զարուհի Փոստանջյանը անդրադառնալով Սամվել Բաբայանի՝ Արցախ վերադառնալու թեմային, այսօր լրագրողների հետ զրույցում նշեց, որ չնայած դրական է գնահատում Լեռնային Ղարաբաղի Պաշտպանության նախկին նախարարի վերադարձն Արցախ, այնուամենայնիվ, կարծում է, որ Սամվել Բաբայանի վերադարձը քաղաքական դեֆորմացիա է առաջացրել Արցախում: Նրա խոսքով՝ այն իր անդրադարձն է ունեցել նաև Հայաստանի ներքաղաքական կյանքում. «Նրա վերադարձն առաջացրել է քաղաքական դեֆորմացիա հենց Արցախում, և մենք, լինելով անկախ պետականություններ, այնուամենայնիվ, մեկ քաղաքական տարածք ենք, և նրա վերադարձն ալիք է բարձրացրել ամբողջ հայկական պետականության տարածքում»:
Զարուհի Փոստանջյանի դիտարկմամբ՝ Արցախի իշխանությունը հետ է կանգնում ժողովրդավարությունից: Անդրադառնալով ԼՂՀ ԱԺ փոխխոսնակ Դավիթ Բաբայանի հայտարարությանը ԼՂՀ ընդդիմադիր պատգամավոր Հայկ Խանումյանին ծեծի ենթարկելու վերաբերյալ, նշեց, որ Արցախի իշխանությունների նման տեսքով հայտարարություններն ադեկվատ չեն և հարիր չէ իրենց կրած պաշտոնին. «Որևիցե մեկը չի կարող ասել, թե հստակ ինչ է տեղի ունեցել, և տուժողի հայտարարությունը վարկաբեկելը, ասել, որ դրանք արժանահավատ չեն, այն էլ ոչ իրավապահ մարմնի ներկայացուցչի կողմից, դա, կարծում եմ, ուղղորդված է և մատնանշում է, որ իրենք ունեն մեղավորություն այս բռնությունների կատարման մեջ:
Եվ շատ ցավալի է, որովհետև մենք խնդիր ունենք ժողովրդավար հանրապետություն ունենալու և լինելու Ադրբեջանից տարբեր»,- ասաց Զ.Փոստանջյանը:
Նա կոչ արեց, որ Լեռնային Ղարաբաղի իշխանությունները, իրավապահներն արագ գործեն, բացահայտեն մեղավորներին ու նրանց պատասխանատվության ենթարկեն:
Մանրամասները՝ տեսանյութում: