Շինարարական բիզնեսում հայտնի գործարար, կառուցապատող Սամվել Մայրապետյանի ֆինանսական կեղծարարությունները հովանավորվում են նախագահի աշխատակազմից, քաղաքապետարանից ու դատարանից, վստահ են Տերյան 23, Պուշկինի 4 և 10 հասցեների բնակիչները:
Սամվել Մայրապետյանին պատկանող «Լոկալ Դիվելոփրզ» և Մայրապետյանի հետ համագործակցող՝ անշարժ գույքի գնահատման «Անիկոմ» ընկերությունը փորձում են բնակիչներին գումարային վնաս տալ, վստահեցնում են բնակիչները:
Իրենց գույքը սխալ գնահատելու համար բնակիչները դիմել են ոստիկանության կազմակերպված հանցավորության դեմ պայքարի գլխավոր վարչություն: Գործն ուսումնասիրվել և ուղարկվել է քննչական կոմիտե: Հատկանշական է, որ քննիչի որոշման մեջ արձանագրվել է, որ անշարժ գույքի գնահատման գործընթացի ժամանակ «Անիկոմ» ՍՊԸ տնօրեն Պյոտոր Գրիգորյանն ու գնահատման մասնագետ Գևորգ Ստեփանյանն իրենց լիազորություներն օգտագործել են ի շահ կառուցապատողի:
Բնակիչները պահանջում են վերահսկել Մայրապետյանի և կառուցապատողի հետ գործակցող ընկերությունների գործունեությունը և կանխել խաբեությունը: Նրանք վստահեցնում են՝ պայքարելու են իրենց սեփականությունների համար լիարժեք փոխհատուցում ստանալու համար: Իսկ թե ինչ է պատրասվում անել Սամվել Մայրապետյանը՝ չհաջողվեց պարզել: «Գործը քննության փուլում է» պատճառաբանությամբ կառուցապատողը հրաժարվեց որևէ մեկնաբանություն տալ:
Լուսանկարը՝ Photolure-ի
