Ամերիկացի հայտնի նկարիչ Էնդի Ուորհոլի ինքնադիմանկարը վաճառվել է ռեկորդային գնով՝ 38.4 մլն դոլարով: Վաճառքը տեղի է ունեցել մայիսի 11-ին Նյու Յորքում՝ Christie’s աճուրդների տանը: 1963-64 թթ. ստեղծված աշխատանքը դարձել է հետպատերազմյան և ժամանակակից արվեստի նմուշներից ամենաթանկարժեք գործը: Այս նկարի գինը ռեկորդ է սահմանել նաև Ուորհոլի ինքնադիմանկարների մեջ: Այս մասին հաղորդում է France Presse գործակալությունը:
Մինչ այդ մասնագետներն ակնկալում էին այդ նկարի համար ստանալ 20-30 մլն դոլար: Նկարի գնորդի անունը չի բացահայտվել: Բացի այդ, երեկ Christie’s-ում վաճառվել է Ուորհոլի ևս մեկ` 1986 թ. ստեղծված ինքնադիմանկարը, որի համար վճարվել է 27.5 մլն դոլար:
Այդ օրը Christie’s-ում վաճառված 62 լոտի ընդհանուր գինը կազմել է 300 մլն դոլար: Երեկ մենք տեղեկացրել էինք, որ Ուորհոլի աշխատանքներից վաճառվել է նաև Sotheby’s աճուրդների տանը: Ամենաթանկ լոտը «Ժակլինի 16 դեմքերը»-ն է եղել, որը վաճառվել էր 20.2 մլն դոլարով:
