ԱՄՆ նախագահ Բարաք Օբաման քաղաքացիական հասարակության ներկայացուցիչներին հավաստիացրել է, որ երկրի հատուկ ծառայությունները չեն գաղտնալսում նրանց հեռախոսները և չեն նայում էլեկտրոնային փոստերը, հաղորդում է Vesti-ն:
ԱՄՆ վարչակազմի ղեկավարի հանդիպումը Քաղաքացիական իրավունքների և ազատությունների հարցերով հսկիչ խորհրդի ներկայացուցիչների հետ կայացել է Սպիտակ տանը և տևել է մեկ ժամ:
Վարչակազմի ներկայացուցչի խոսքերով՝ նախագահը պատրաստ է խորհրդի անդամներին ներկայացնել բոլոր նյութերը, որոնք անհրաժեշտ են հսկիչ և խորհրդատվական գործառույթների կատարման համար:
Անցած հանդիպումը նա բնութագրել է որպես համակողմանի քննարկում` ուղղված ԱՄՆ ազգային անվտանգության ապահովմանը և ամերիկացիների իրավունքների և ազատությունների պահպանմանը:
Նշենք, որ Քաղաքացիական իրավունքների և ազատությունների հարցերով հսկիչ խորհուրդը հիմնվել է 2004 թ.՝ ԱՄՆ-ի Կոնգրեսի կողմից՝ երկրի նախագահի առաջարկով: