Բնակչությանն ուղղված հեռուստաուղերձում Բրազիլիայի նախագահ Դիլմա Ռուսեֆը հայտարարել է մի շարք նոր կարևոր սոցիալական ծրագրերի մասին: Հիշեցնենք, որ երկրում արդեն երկու շաբաթ է՝ կենսապայմանների դեմ բողոքի զանգվածային ցույցեր են անցկացվում երկրի մի քանի տասնյակ քաղաքներում: Այս մասին հայտնում է ITAR-TASS-ը:
Պետության ղեկավարը խոստացել է մշակել քաղաքային հասարակական տրանսպորտի բարելավման համազգային ծրագիր, նավթից ստացված եկամուտներն ամբողջությամբ ուղղել կրթական խնդիրների լուծմանը և անվճար պետական առողջապահության համակարգում աշխատելու համար արտերկրից բժիշկներ հրավիրել: Նա ընդգծել է, որ հաջորդ տարի Ֆուտբոլի աշխարհի առաջնության հյուրընկալման պատրաստությունները չեն ազդել կրթության ու առողջապահության բյուջետային ծրագրերի վրա:
Նա կոչ է արել հայրենակիցներին սրտաբաց ընդունելության արժանացնել մարզիկներին ու հյուրերին: Նրա խոսքերով՝ ինքն անձամբ է պատրաստ ուժեղացնել պայքարը կոռուպցիայի դեմ: Ռուսեֆը վստահեցրել է, որ լսում է «փողոցի ձայնը», սակայն նախազգուշացրել է, որ բռնության ու վանդալիզմի գործողությունները պետք է վճռականորեն ճնշվեն:
Բողոքի զանգվածային ցույցերի ընթացքում տեղի ունեցած բախումների հետևանքով զոհվել է երկու մարդ, հարյուրավոր մարդիկ վնասվածքներ են ստացել:
