Թուրքական Hürriyet Daily News թերթի փոխանցմամբ՝ Գերմանիայի խորհրդարանի պատգամավորներից Բետինա Կուդլան, ով ներկայացնում է կանցլեր Անգելա Մերկելի Քրիստոնեա-դեմոկրատական միություն կուսակցությունը, պարզաբանել է, թե ինչու է Բունդեսթագում դեմ քվեարկել Հայոց ցեղասպանությունը ճանաչող բանաձևին՝ դառնալով դեմ քվեարկած միակ պատգամավորը:
Նա հայտարարել է, որ բանաձևին դեմ է քվեարկել, քանի որ կարծում է, որ Բունդեսթագի պարտականությունների մեջ չի մտնում այլ երկրներում կատարված պատմական իրադարձությունների շուրջ քվեարկելը:
«Այլ երկրներում գրանցված պատմական դեպքերը գնահատելը չի մտնում դաշնային խորհրդարանի պարտականությունների մեջ: Խորհրդարանում ներկայացված բանաձևում տեղ չի գտել նաև պատմաբանների որևէ գնահատական, որն ի ցույց կդներ, որ դա ցեղասպանություն է:
Անհնար է չտեսնել նաև այդ բանաձևի քաղաքական ու ֆինանսական հետևանքները: Այն կարող է լրջորեն հարվածել Գերմանիայի ու Թուրքիայի հարաբերություններին: Այն վտանգում է նաև ԵՄ-ի ու Թուրքիայի միջև ներգաղթյալների գործարքը, որի կրախը կհանգեցնի մարդասիրական շատ լուրջ հետևանքների և ֆինանսական խոշոր բեռ կդառնա Գերմանիայի համար»,- հայտարարել է նա:
