Միջերկրական ծովում EgyptAir-ի ինքնաթիռի կործանումից առաջ օդանավի աշխատանքում 24 ժամվա ընթացքում առնվազն 3 անգամ նկատվել են անսարքություններ: Այս մասին գրում է Parisien թերթը՝ հղում անելով սեփական աղբյուրներին:
Ինչպես տեղեկացնում է պարբերականը, շեղումներ են գրանցվել Էրիթրեայի մայրաքաղաք Ասմերից ինքնաթիռի թռիչքի, ինչպես նաև Թունիսից և Եգիպտոսից թռիչքի ժամանակ:
Նշվում է, որ կործանումից մեկ օր առաջ ինքնաթիռը կատարել է միջին հեռավորության 6 թռիչք: Նրա վերջին կանգառը եղել է Փարիզի «Շառլ դե Գոլ» օդանավակայանը:
Ֆրանսիական France 3 հեռուստաալիքը նույնպես հայտնել է կործանումից առաջ ինքնաթիռի հետ կապված 3 դեպքերի մասին: Հեռուստաալիքի տվյալներով՝ այդ օրը «առնվազն 3 անգամ» ինքնաթիռը ստիպված է եղել փոխել ուղղությունը կամ իրականացնել արտակարգ վայրէջք:
Չորեքշաբթի ավիաաղետների հետաքննությունների ֆրանսիական բյուրոն (BEA) հաստատել է, որ Միջերկրական ծովում Ֆրանսիայի ռազմածովային ուժերի նավի կողմից գրանցված ազդանշանը դուրս է եկել EgyptAir ընկերության կործանված ինքնաթիռի «սև արկղից»:
Ներկա պահին կա տեղի ունեցածի մի քանի վարկած, որոնցից մեկը ահաբեկչությունն է:
