Վանաձորի թիվ 8 դպրոցի գործին արդեն խառնվում է Լոռու երրորդ մարզպետը, սակայն ինը տարվա մեջ խնդիրը չի լուծվում:
2004-ին աշխատատեղերի և աշխատողների կրճատման հիմքով համակարգչային օպերատոր և ինֆորմատիկայի ուսուցիչ Սուսաննա Սարգսյանը ազատվել է աշխատանքից և վերականգնվել դատական կարգով, սակայն, ըստ դպրոցի տնօրեն Կարինե Ստեփանյանի՝ ուսուցչուհին 22 օր չի ներկայացել աշխատանքի: Դրանից հետո ԴԱՀԿ աշխատակցի հետ եկել է, պարտավորեցրել ավելացնել իր դասաժամերը, որից հետո նորից չի կատարել աշխատանքային պարտականությունները և որպես գործալիք՝ 22 օր բացակայելու համար ազատվել աշխատանքից: Նա նշեց, որ այս տարիներին կատարվել է պետական միջոցների հափշտակություն:
«Այսօր խոսքը 11 միլիոնի մասին է, 2012-ին նորից դիմել է դատարան՝ պահանջելով 2007-ից մինչև 2012-ի չստացված աշխատավարձը՝ հիմքում դնելով այն աշխատավարձի չափը, որը երբեք մեզ մոտ նա չի ստացել. նա մեկ դրույքի աշխատավարձի թուղթ է ներկայացրել, իսկ դատավոր Ալավերդյանը, առանց հիմնավոր ստուգելու փաստաթղթերը, որոշել է, որ պետք է տրվի: Եվ հիմա նոր հայցապահանջի հիմքում այդ սուտ աշխատավարձի չափն է»,- ասաց տնօրենը՝ հավելելով, որ 2 մլն 632 հազար արդեն տարվել է դպրոցից, հիմա պահանջում է ութ միլիոն, մյուս ամիս արդեն կլինի 8 միլիոն 66 հազար:
«Դպրոցը թալանվում է մեկ անձի կողմից»,- հայտարարեց տնօրենը:
Ի դեպ, Սուսաննա Սարգսյանը աշխատում է Վանաձորի կրթության ազգային ինստիտուտում:
Գործի վերաբերյալ տասը դատական գործ կա՝ երկու վարչական, երկու քրեական և վեց քաղաքացիական: Ըստ տնօրենի՝ սա փող աշխատելու միջոց է, որը մեզանում նախադեպ է դառնում, և հիմա Վանաձորի դպրոցներից մեկում համակարգչային օպերատորը դպրոցի տնօրենից չորս տարվա հարկադիր պարապուրդի գումար է ուզում:
2007թ. դպրոցից բռնագանձվել է 2 մլն 632 հազար դրամ, իսկ այս տարվա ապրիլին դատարանի որոշմամբ՝ 1 մլն 870 հազար դրամ:
Մայիս ամսվա աշխատավարձը մանկավարժները չեն ստացել, քանի որ ԴԱՀԿ-ն արգելանք է դրել դպրոցի աշխատավարձերի հաշվեհամարի վրա: Այս պահին դպրոցի հաշվեհամարի վրա 3.5 միլիոն սառեցված գումար կա, չեն թողնում ստանան աշխատավարձ, Լոռու մարզի ԴԱՀԿ պետի հետ հանդիպել են, ասել, որ իրավունք չունեն մարդու աշխատածը գանձելու:
Տնօրենը կարծում է, որ այս ամենը հովանավորվում է Վանաձորի ընդհանուր իրավասության դատարանի նախագահ Գագիկ Հովհաննիսյանի կողմից:
Հետաքրքրվեցինք՝ հնարավո՞ր է, որ այս գործում անձնական վրեժխնդրության պահ կա, տնօրենը նշեց, որ նման բան չկա, օպտիմալացման արդյունք էր:
Մանկավարժներից մեկը նշեց, որ ինքը ուներ չորս ժամ, և պետք է կրճատվեր:
«Այս ամենը կառուցել է ստի վրա, և մենք ինը տարի՝ մեր հանգիստը խանգարած, աշխատում ենք»,- ասացին ուսուցիչները:
Լուսանկարը՝ PanARMENIAN Photo-ի
