Ինչպես արդեն հայտնի է, ՀՀ պաշտպանության նախարարությունում տեղի են ունեցել նոր պաշտոնանկություններ. պաշտոնանկ է եղել և ձերբակալվել Զինված ուժերի սպառազինության վարչության պետ, գեներալ-մայոր Մելս Չիլինգարյանը, ձերբակալվել են նաև գնդապետներ Արմեն Մարգարյանը և Մհեր Պապյանը:
ՊՆ մամլո քարտուղար Արծրուն Հովհաննիսյանը «Առաջին լրատվական»-ի հետ զրույցում այս առնչությամբ նշեց, որ այդ ձերբակալությունները հավանաբար կապված են իրենց գործառույթների հետ, որոնք, ըստ երևույթին, քրեորեն պատժելի են:
Նա տեղին չհամարեց այդ ամենը կապել այս ստուգումների հետ, որովհետև այդ ռիսկային ոլորտներում՝ մարդկային ռեսուրսների կառավարում և գնումներ, պարբերաբար կատարվում են ստուգումներ. «Հեռացվել են համապատասխան պաշտոնյա անձինք նաև ներքին վերահսկողության ստուգումներից հետո: Այսինքն՝ պետք չէ ամեն ինչ կապել X իրավիճակի հետ»:
ՊՆ մամուլի քարտուղարի խոսքով՝ պաշտոնանկություններին առնչվող քննարկումները հիվանդագին բնույթ են ձեռք բերում. «Չեմ հորդորի ծայրահեղացնել և ամեն ինչ փաթեթավորել այս պաշտոնանկություններով»:
Հարցին՝ Սերժ Սարգսյանի կողմից հնչեցված 800 հեկտար տարածքի կորուստը ինչպե՞ս է չափված՝ դարձյալ Google Map-ո՞վ, Արծրուն Հովհաննիսյանը դժվարացավ պատասխանել՝ հստակեցնելով, որ դա տարածքային կորուստ չէ, այլ խուսանավում:
Մեր զրուցակիցը չի կիսում Սամվել Բաբայանի կարծիքը, թե ապրիլյան դեպքերը ռազմական գործողություններ չէին. «Իմ կարծիքով՝ այն մարդիկ, ովքեր այդ օրերին եղել են Արցախում և տիրապետում են օպերատիվ իրավիճակին, միանշանակ դա որակել են որպես պատերազմական գործողություններ, որոնք վաղուց դասական որոշակի կանոններից շեղվել են և ընդունել տարբեր սողացող, հիբրիդային և այլ բնույթներ»:
ՊՆ մամլո քարտուղարը հիշեցրեց, որ պատերազմը դեռ չի ավարտվել և պետք չէ ստիպել շատ խաղաքարտեր բացել՝ տեղին չհամարելով այս իրավիճակում գերագույն գլխավոր հրամանատարի կամ պաշտպանության նախարարի հասցեին հնչեցված մեղադրանքները, «Այս տարիների ընթացքում տասնյակ տարածքներ են բարելավվել, թողեք՝ զինվորականները զբաղվեն: Որևէ մեկը կասկածո՞ւմ է, որ բանակը իր խնդիրը կկատարի»:
