Շվեյցարացի պատգամավորները վերջնականապես մերժել են ենթարկվել ամերիկյան արդարադատության ճնշմանն ու չեղյալ են հայտարարել բանկային գաղտնիքի սկզբունքը: Ազգային խորհրդում (խորհրդարանի ստորին պալատ) քվեարկության ժամանակ 123 պատգամավորները մերժել են շտապ քննարկումներ սկսելու կառավարության առաջարկը: Քննարկումները պետք է հանգեցնեին օրենքի ընդունման: Այս մասին հայտնում է ITAR-TASS-ը: Օրենքը կոչված է փրկելու երկրի բանկերը ԱՄՆ-ի քրեական հետապնդումներից: Կառավարության դիրքորոշմանն աջակցել են 63 պատգամավորներ, 4-ը ձեռնպահ են մնացել:
Ընդունվելու դեպքում օրենքը համադաշնության բանկերին հնարավորություն կտա ԱՄՆ հարկային մարմինների հետ հարաբերությունները սկսել մաքուր էջից՝ նրանց հետ կնքելով համաձայնագիր: Պատգամավորներին մտահոգել է այն, որ ԱՄՆ-ը հրաժարվել է համաձայնագրի մանրամասները ներկայացնել:
Օրինակ՝ պարզ չի եղել, թե ինչպիսի պատժամիջոցների կենթարկվեն շվեյցարական բանկերը: Ընդհանուր առմամբ՝ Վաշինգտոնը հավակնություններ ունի շվեյցարական 10 բանկերի դեմ, որոնք երկար տարիների ընթացքում հարկերից խուսափելու հարցում օգնել են ավելի քան 10 հազար ամերիկացիների:
Խորհրդարանի վերին պալատը երկու անգամ աջակցություն է հայտնել կառավարության առաջարկին, ընդ որում՝ վերջին անգամ երեկ:
Երկրի ֆինանսների նախարար Էվելին Վիդմեր-Շլումպֆի խոսքով՝ այդ սցենարով իրադարձությունների զարգացման դեպքում ԱՄՆ իշխանությունները կարող են շվեյցարական բանկերի դեմ քրեական գործ սկսել: