Associated Press տեղեկատվական գործակալության նախագահ Գերի Փրյուիթը ներկայացրել է հինգ կետից բաղկացած ծրագիր՝ ուղղված ԱՄՆ-ում մամուլի ազատության պահպանմանը և ամրապնդմանը: Նման ծրագիր ներկայացնելու պատճառը տեղեկատվությունն էր այն մասին, որ նախկինում ԱՄՆ հատուկ ծառայությունները գաղտնալսել են գործակալության աշխատակիցների հեռախոսազրույցները:
AP-ի նախագահը ԱՄՆ-ի արդարադատության նախարարությունից պահանջում է «ընդունել ժամանակին տեղեկացված լինելու մամուլի իրավունքը, ինչպես նաև նրան տալ լսվելու հնարավորություն»:
Նրա հաջորդ պահանջը դատական հսկողությունն է: Փրյուիթի խոսքով՝ AP-ի դեպքում արդարադատության նախարարությունն անձամբ որոշեց, որ կարելի է նախօրոք տեղյակ չպահել:
«Սահմանադրական կանոններից ինքնակամ հրաժարվելը չպետք է նորմ լինի մեր կառավարության համար»,- ասել է նա:
Արդարադատության նախարարությունը պետք է արդիականացնի իր ծառայողական հրահանգները, որոնք ստեղծվել են մինչև համացանցի դարաշրջանը և չեն տարածվում էլեկտրոնային փոստի և տեքստերի վրա՝ կարծում է Փրյուիթը:
Գործակալության առաջնորդն առաջարկել է ընդունել լրագրողների արտոնության պաշտպանության դաշնային այնպիսի օրենք, որը լրագրողներին կպաշտպանի կառավարության միակողմանի և գաղտնի գործողություններից:
Ծրագրի վերջին կետով արդարադատության նախարարությանը կոչ է արվել կյանքի կոչել գլխավոր դատախազ Էրիկ Հոլդերի խոստումը, համաձայն որի՝ իր գերատեսչությունը չի հետևի ոչ մի լրագրողի՝ այն բանի համար, որ վերջիններս կատարում են իրենց գործը:
«Այդ կանոնը պետք է մշտական դարձնել, որպեսզի այն գործի նաև ոչ միայն ներկայիս վարչակազմում»,- հստակեցրել է նա:
