Ռուսական RIA Novosti լրատվական գործակալության փոխանցմամբ՝ Իրանի արտգործնախարար Մոհամմադ Ջավադ Զարիֆն իր եվրոպական շրջագայության շրջանակներում այսօր հանդիպել է իր ֆինն գործընկեր Տիմո Սոյնիի հետ:
Հանդիպումը տեղի է ունեցել Հելսինկիում գտնվող Ֆինլանդիայի ԱԳՆ-ի շենքում: Հանդիպման ժամանակ Զարիֆը Սոյնիին իրազեկել է Իրանի տնտեսական ու բանկային դրության մասին՝ հավելելով, որ Իրանը ձգտում է միջուկային գործարքից հետո հասնել տնտեսական կապերի ընդլայնմանը:
Զարիֆը կարևորել է իրանցի ու ֆինն գործարարների հանդիպումը, ինչպես նաև երկու երկրների առևտրային պալատների անդամների նիստը՝ ցանկություն հայտնելով, որ երկու երկրների միջև հաստատվեն ամուր կապեր:
Սոյնին իր հերթին ընդգծել է Հելսինկիի ու Թեհրանի միջև կապերի ընդլայնման անհրաժեշտությունը, որը հատկապես վերաբերում է կրթական ու հաղորդակցային ոլորտներում: Հաղորդվում է, որ Զարիֆը Ֆինլանդիան լքելու է այսօր երեկոյան և մեկնելու է Ստոկհոլմ՝ հանդիպելու համար Շվեդիայի իշխանությունների ներկայացուցիչների հետ:
