ՀՀ ոստիկանապետ Վլադիմիր Գասպարյանը հունիսի 19-ին Արզնիում ոստիկանական ուժերի զորավարժանքից հետո լրագրողների հետ ունեցած զրույցում անդրադարձել է «օֆշորային» սկանդալին, ինչպես նաև Գորիսի դեպքերին:
– Պարոն ոստիկանապետ, 2008-ին անհամաչափ ո՞ւժ է կիրառվել, և ոստիկանությունն իրեն մեղավոր համարո՞ւմ է:
– Ես չեմ կարող գնահատականներ տալ, որովհետև այդ միջոցառմանը չեմ մասնակցել, ես չեմ կառավարել, ես էլ Ձեզ նման եղել եմ հանդիսատեսի կարգավիճակում՝ անկախ ամեն ինչից, թե լրատվամիջոցներն ինչեր էին պատմում այն ժամանակ, դրանից հետո և իմ նշանակվելու ժամանակ:
– Պրն ոստիկանապետ, ցուցարարները գոռում էին ազատություն, արդարություն: Մի՞թե ազատություն և արդարություն գոռացողների վրա կարելի է այդպիսի ուժ կիրառել:
– Պայմանական ազատություն, արդարություն գոռացողների վրա պայմանական ուժ է կիրառվել:
– Կարծես թե մենք Ձեր կարծիքը չենք լսել Գորիսի դեպքերի հետ կապված: Իհարկե, զինդատախազությունն է քննում գործը, սակայն իրավիճակը գնահատելով՝ Դուք Գյումրիում կարծես թե ինչ–որ քայլեր կատարեցիք՝ իրավիճակը շտկելու ուղղությամբ, հնարավո՞ր է, որ հերթական այցը…
– Զեկուցեմ Ձեզ, որ միջոցառումներն իրականացվում են ամբողջ հանրապետության տարածքում, և եթե ուշադիր եք մեր լրատվությանը, ապա մենք պարբերաբար Ձեզ զեկուցում ենք գործերի մասին, հանցագործությունների բացահայտման մասին և այլն, բոլոր երևույթների մասին: Ինչ վերաբերում է Գորիսի դեպքին, ես կարծում էի, որ բոլոր մեսիջները, որոնք ուղարկվեցին, հասկանալի էին բոլորին:
– Շատ են հնչում նախկին մարզպետի պատասխանատվության կոչեր: Որպես հետաքննություն իրականացրած մարմին՝ արդյոք տեսնո՞ւմ եք նման անհրաժեշտություն և արդյոք հավատո՞ւմ եք, որ նա քնած էր:
– Ես լրագրող չեմ, ես ՀՀ Ոստիկանության պետն եմ և չեմ կարող այդպիսի հռետորական հարցերի պատասխանել: Գործը գտնվում է դատախազություն վարույթում:
– Երեկ հայտնի դարձավ, որ մեղադրանք է առաջադրվել Սուքիասյանի դեմ՝ մեկ տարի առաջ հարուցված գործով: Ինչո՞ւ է երեկ մեղադրանք առաջադրվել, եթե նրա գտնվելու վայրն այլևս անհայտ է:
– Ոչ մեկի գտնվելու վայրը մոլորակի վրա անհայտ չի կարող լինել: Գոնե մենք այս տարիներին ապացուցել ենք՝ Հայաստան ենք բերում զբոսաշրջիկ-հանցագործների: Ես այստեղ խնդիր չեմ տեսնում: Մեկ տարին մի քիչ ավելի քիչ ժամանակ է եղել: Գրագրությունն այլ երկրների հետ շատ դժվար է եղել: Եթե նախկին սովետական որոշ երկրների հետ կարողանում ենք հեռախոսով ինչ-որ հարցեր լուծել, ապա այլ երկրների հետ այլ ձևով ենք աշխատում:
– Պրն Գասպարյան, նստացուցերի ժամանակ նկատվում է գործողությունների տեսանկարահանում: Դա ինչի՞ համար է արվում:
– Դա արվում է մի քանի նպատակներով: Դա օպերատիվ մեր աշխատանքն է, որպեսզի տիրապետենք՝ ինչ է տեղի ունենում: Զարմանալի չէ, որ դուք նկարահանում եք:
– Նախորդ զորավարժությունների հետ եթե փորձենք համեմատություն անել՝ ի՞նչ է փոխվել ոստիկանի աշխատանքում:
– Ներդաշնակություն և կազմակերպվածություն:
