ԱՄՆ նախագահի թեկնածու Դոնալդ Թրամփը իր ընտրողներին խոստացել է նախագահ դառնալու դեպքում չեղարկել կլիմայի փոփոխության դեմ պայքարի մասին միջազգային համաձայնագիրը, որը Վաշինգտոնը ստորագրել է ապրիլին: Այս մասին հայտնում է BBC-ի ռուսական ծառայությունը:
«Մենք մտադիր ենք հրաժարվել Կլիմայի վերաբերյալ փարիզյան համաձայնագրից»,- ասել է Թրամփը Հյուսիսային Դակոտայում էներգետիկայի հարցերով համաժողովում:
Թրամփը նշում է, որ համաձայնագիրը փաստացի միակողմանի է և շահավետ չէ ԱՄՆ-ի համար, քանի որ մթնոլորտ ջերմոցային գազերի արտանետումների առաջատար Չինաստանը չի կատարում փաստաթղթով նախատեսված պարտավորությունները:
Թրամփը խոստացել է նաև չեղարկել կլիմայի փոփոխության դեմ պայքարի ծրագիրը, որը մշակել է ԱՄՆ նախագահ Բարաք Օբամայի վարչակազմը:
Օբամայի նախագիծը նախատեսում է հաջորդ 15 տարվա ընթացքում ամերիկյան էլեկտրակայանների կողմից ջերմոցային գազերի արտանետումների մոտ մեկ երրորդով կրճատում:
Թրամփը նշել է, որ ընտրվելու դեպքում կաջակցի Keystone XL խողովակաշարի կառուցման նախագծին, որն Օբամայի վարչակազմն արգելափակել է շրջակա միջավայրին նախագծի հնարավոր վնասի հետ կապված մտավախությունների պատճառով: Սակայն հանրապետականներն աջակցում են նախագծին՝ համարելով, որ այն հնարավորություն կտա լրացուցիչ աշխատատեղեր ստեղծել:
