Թուրքական Anadolu լրատվական գործակալության փոխանցմամբ՝ Թուրքիայի պաշտպանական արդյունաբերության դեպարտամենտի ղեկավարի տեղակալ Իսմայիլ Դեմիրը ԱՄՆ Ատլանտյան խորհրդում ունեցած ելույթում հայտարարել է, որ Թուրքիան ԱՄՆ-ից այլևս չի գնի հարվածային անօդաչու թռչող սարքեր (ԱԹՍ)՝ կապված ԱՄՆ Կոնգրեսի դիրքորոշման հետ:
«Մինչ ՆԱՏՕ-ի գծով դաշնակից Թուրքիան պայքար է մղում ահաբեկչության դեմ, ԱՄՆ Կոնգրեսը հաճախ դեմ է արտահայտվել Թուրքիային հարվածային ԱԹՍ-ներ ու սպառազինության մի շարք տեսակներ վաճառելուն:
Թուրքիան այլևս ԱՄՆ-ից չի գնի հարվածային ԱԹՍ-ներ: Մեզ համար այդ գիրքն արդեն փակված է: Ի պատասխան ամերիկյան իշխանությունների այդ դիրքորոշման՝ Թուրքիան 2013 թվականից սկսել է լուրջ քայլեր ձեռնարկել սեփական հարվածային ԱԹՍ արտադրելու ուղղությամբ:
Նման տեխնոլոգիաների զարգացման համար պահանջվում է որոշակի ժամանակ, սակայն մենք արդեն իսկ լուրջ հաջողությունների ենք հասել այդ հարցում: ԱՄՆ-ի մերժումը Թուրքիային չի կանգնեցնի պաշտպանական արտադրության զարգացման հարցում»,- նշել է Դեմիրը:
