Բելառուսի նախագահ Ալեքսանդր Լուկաշենկոն կարծում է, որ Լեռնային Ղարաբաղի հակամարտության լուծման համար Հայաստանը և Ադրբեջանը պետք է միավորեն ջանքերը: Նա նաև նշել է, որ ԼՂ-ում «նորմալ կյանք չկա»: Ինչպես հաղորդում է Rosbalt-ը, այս մասին Բելառուսի նախագահը հայտարարել է izvestia.kiev.ua-ին տված հարցազրույցի ժամանակ:
Նրա խոսքով՝ ԼՂ հակամարտության կարգավորման համար անհրաժեշտ է երկու նախագահների քաղաքական կամքը:
«Ես հեռու եմ Մերձդնեստրից, նրանից, թե ինչ է տեղի ունենում Վրաստանում, Աբխազիայում, Օսիայում, սակայն մի անգամ ես ներքաշվել եմ այդ խնդրի մեջ: Մի անգամ ընկերներիս հրավերով նրանց մոտ՝ լեռներ գնացի, թեմա բացեցի զուտ բելառուսական մոտեցմամբ: Լեռնային Ղարաբաղ՝ ինչ է այն իրենից ներկայացնում, ինչպես են մարդիկ այնտեղ ապրում, որտեղ են աշխատում: Այնտեղ նորմալ կյանք չկա: Ես հասկացա, որ այս խնդիրը պետք է լուծել: Խոսեցի նախագահներից մեկի հետ, այնուհետև մյուսի: Բացատրեցի, որ իրավիճակն այսպես երկար չի կարող մնալ: Հայերն ինձ հետ համաձայնեցին: Իլհամ Ալիևի հետ նույնպես խոսեցի, նա ասաց, որ դեմ չէ: Չնայած ես ատում եմ միջնորդի դերը, սակայն ես այդ դերն առաջարկեցի Ուկրաինային, ինչը նրանք չցանկացան»,- ասել է Լուկաշենկոն:
