Հունիսի 15-ին milkavkaz.net կայքում հրապարակվել են լուսանկարներ, որոնցում պատկերված են ցամաքային զորքերի համար նախատեսված տեխնիկայի և տանկերի փոխադրում Ռուսաստանից, որը, ինչպես պնդում են ֆորումի այցելուները, կարող է ցուցադրվել հունիսի 26-ին Բաքվում Ադրբեջանի Զինված ուժերի օրվան նվիրված շքերթին: Ինչպես հաղորդում է «Վեդոմոստի»-ն՝ վկայակոչելով Ռուսաստանի ՊՆ աղբյուրներին, լուսանկարներն իրական են և պատկերում են Ռուսաստանից Ադրբեջան գարնանը սկսված ցամաքային ռազմական տեխնիկայի մատակարարումների գործընթացը, որոնք իրականացվում են 2011-2012 թթ. կնքված պայմանագրերի հիման վրա:
Պայմանագրերով Ադրբեջանը Ռուսաստանից կստանա երեք գումարտակ Ռ-90Ս տանկ (94 միավոր), երեք գումարտակ ԲՄՊ-3 մարտական մեքենաներ (100 միավոր), «Մստա-Ս» ինքնագնաց հրետանային համակարգի դիվիզիոն (18 միավոր), համազարկային կրակի«Սմերչ» ռեակտիվ համակարգերի դիվիզիոն (18 միավոր), «Վենա» ինքնագնաց հրետանային զենքերի դիվիզիոն (18 միավոր), և ՏՕՍ-1Ա «Սոլնցեպեկ» ծանր կրականետ համակարգի մարտկոց (6 միավոր):
Տանկերի հետ միասին Ադրբեջանը գնում է նաև զրահապատ ԲՐԷՄ-1Մ մեքենաներ, ԻՄՌ-3Մ ապապատնեշման ինժեներական մեքենաներ, ինչպես նաև մեքենաներ, որոնք անհրաժեշտ են կրակի ապահովման և կառավարման համար:
Ռուսաստանի պաշտպանության նախարարության աղբյուրը գործարքը գնահատում է շուրջ 1 միլիարդ դոլար: Ինչպես հաղորդում է «Վեդոմոստի»-ն, «Ռոսոբորոնէքսպորտ»-ի ներկայացուցիչը հրաժարվել է մեկնաբանություններ անել: Ադրբեջանի ՊՆ-ից ևս չի հաջողվել մեկնաբանություններ ստանալ:
Հաղորդվում է, որ սա Ռուսաստանի և Ադրբեջանի միջև կնքված զենքի պայմանագրերի առաջին խոշոր փաթեթը չէ: 2010-2011 թթ. Ռուսաստանն Ադրբեջանի ԶՈՒ-ին և ուժային այլ կառույցներին մատակարարել է 3 միլիարդ դոլարի Ս-300ՊՄՈՒ-2 զենիթահրթռիային համակարգեր, «Տոր-2ՄԷ» զենիթահրթիռային համալիրների մի քանի մարտկոցներ, Մի-17 60 տրանսպորտային ուղղաթիռներ, Մի-35Մ հարվածային ուղղաթիռներ:
Այս իրավիճակում թերթը նմանություն է տեսնում ԱՄՆ-ի և ՆԱՏՕ-ի երկրների քաղաքականության հետ, որոնք զենքի խոշոր խմբաքանակներ են մատակարարում հակառակորդներին՝ Եգիպտոսին և Իսրայելին, Հունաստանին և Թուրքիային:
Հիշեցնենք՝ ավելի վաղ հաղորդել էինք այն մասին, որ Ադրբեջանը Ռուսաստանից ձեռք է բերել ՏՕՍ-1Ա հրանետային համակարգեր, ինչպես նաև Տ-90Ս տանկեր, 2Ս19 ինքնագնացներ և ԲՄՊ-3:
