Մեծ Բրիտանիայի վարչապետ Դևիդ Քեմերոնը «ութնյակի» կողմից Սիրիայի հարցով ձգտում է հասնել 5 կետից կազմված հայտարարության ընդունման: Եթե Ռուսաստանը չաջակցի Լոնդոնի պատրաստած հայտարարության տեքստին, հայտարարությունը կարող է ընդունվել առանց նրա մասնակցության՝ մնացած 7 պետությունների կողմից: Այս մասին Reuters գործակալությանը հայտնել է բրիտանական կառավարության աղբյուրը:
Մեծ Բրիտանիայի կառավարության ներկայացուցչի խոսքով՝ Քեմերոնը ցանկանում է, որպեսզի գագաթնաժողովի մասնակիցները 5 կետի շուրջ միասնական կարծիքի գան:
Առաջին կետը վերաբերում է Սիրիայում մարդասիրական օգնության մատակարարման ապահովմանը, երկրորդը՝ երկրում իսլամիստ ծայրահեղականների դեմ պայքարին, երրորդը՝ քիմիական զենքի կիրառման դատապարտմանը, չորրորդը՝ Սիրիայում իրադրության կայունացման ռազմավարության ձևավորմանը և հինգերորդը՝ այդ երկրում անցումային կառավարության ստեղծմանը:
Ինչպես հաղորդվում է, խմբի առաջնորդները սիրիական խնդիրը քննարկել են երկուշաբթի՝ օրվա երկրորդ կեսին, աշխատանքային ընթրիքի ժամանակ: Բրիտանական կառավարության ներկայացուցչի խոսքով՝ Ռուսաստանի և Արևմուտքի երկրների միջև առկա է փոխըմբռնում Սիրիայում իսլամիստ ծայրահեղականության դեմ պայքարի անհրաժեշտության հարցում:
Ռուսաստանի և Արևմուտքի երկրների միջև տարաձայնությունները վերաբերում են Սիրիայի իշխանությունների կողմից քիմիական զենքի կիրառման մեղադրանքներին: Ռուսաստանը կասկածի տակ է դնում այդ մեղադրանքները և դրանք համարում չապացուցված:
