Միացյալ Նահանգների նախագահ Բարաք Օբաման պատրաստվում է Սիրիայի նախագահ Բաշար Ալ-Ասադի ռեժիմն անօրինական հայտարարել: Այս մասին հաղորդում է Associated Press գործակալությունը` հղում անելով Սպիտակ տանն իր աղբյուրներին: «Մենք իրոք մոտ ենք դրան»,- ասել է այդ աղբյուրը` նշելով, որ այդպիսի քայլը կստիպի «գործել ԱՄՆ-ին և միջազգային հանրությանը»:
«Մենք կոչ ենք անում Սիրիայի կառավարությանը դադարեցնել բողոքի զանգվածային ցույցերի մասնակիցների սպանությունը, չխոչընդոտել խաղաղ ցույցերին, դադարեցնել ձերբակալությունները և սկսել սահմանադրական երկխոսություն»,- հայտարարել է ԱՄՆ պետքարտուղարության պաշտոնական ներկայացուցիչ Մարկ Թոները: Նա նշել է, որ Բաշար Ալ-Ասադը դեռ հնարավորություն ունի քավելու իր մեղքերը, սակայն այդ «պատուհանը փակվում է»:
Մի քանի շաբաթ առաջ ԱՄՆ իշխանություններն արդեն ընդունել են պատժամիջոցներ՝ ընդդեմ Սիրիայի գործող ռեժիմի ներկայացուցիչների: Հիմա խոսվում է այդ պատժամիջոցների ցանկն ավելացնելու մասին:
Երեկ հայտնի է դարձել նաև, որ Սիրիային դուրս են թողել ՄԱԿ-ի մարդու իրավունքների հանձնաժողովից: Այսուհետ նրա տեղը կզբաղեցնի Քուվեյթը: Սիրիային անդամությունից զրկելու գործընթացը նախաձեռնվել էր այդ երկրում բողոքի ակցիաների սկսվելուն պես: Եվ սա՝ չնայած այն փաստին, որ երեկ Սիրիայի բանտերից բաց է թողնվել ավելի քան 300 մարդ: Այդուամենայնիվ, սիրիական իրավապաշտպանները խոսում են ավելի քան 750 զոհվածի մասին: Ձերբակալվածների թիվն այժմ անցնում է մի քանի հազարից:
