Վրաստանն այլընտրանք չունի, նա պետք է ԱՄՆ-ի հետ լինի, որը ցանկանում է տեսնել միացյալ և ուժեղ Վրաստան, և ոչ թե` Ռուսաստանի հետ, որին պետք է մասնատված և թույլ Վրաստան: Այս մասին հայտարարել է Վրաստանի նախագահ Միխեիլ Սաակաշվիլին՝ մեկնաբանելով ԱՄՆ կոնգրեսի հայտարարությունը, ըստ որի՝ Վրաստանում քաղաքական դրդապատճառներով հետապնդում են նախկին պաշտոնյաներին:
«ԱՄՆ-ը մեր ընկերը և գործընկերն է, որը 2008-ին օդ բարձրացրեց ինքնաթիռները և 6-րդ ռազմածովային նավատորմն ուղարկեց Վրաստանի ափերը, ինչն էլ փրկեց մեզ վերջնական կործանումից ու ամբողջական բռնազավթումից: Դա պետք է հասկանալ և ճիշտ որոշումներ ընդունել»,- ընդգծել է Սաակաշվիլին:
Նախագահն «անհիմն» և «ծիծաղելի» է անվանել Վրաստանի իշխանությունների այն հայտարարությունը, ըստ որի՝ ԱՄՆ կոնգրեսականներին հաջողվել է «չեզոքացնել» Սաակաշվիլիին և նրա կուսակցությանը: Սաակաշվիլին նաև նշել է, որ «չի կարելի հրաժարվել ընկերոջ օգնությունից և երկիրը նետել զավթիչի գիրկը»:
