Մալաթիա-Սեբաստիա վարչական շրջանի ընդհանուր իրավասության դատարանում Կարեն Ֆարխոյանի նախագահությամբ ընթանում է Կարինե Աբազյանի գործի դատավարությունը:
Քրեական գործի դատաքննությունը հայտարարվել էր ավարտված, դատարանն անցել էր դատական վիճաբանություններն ունկնդրելուն և ամբաստանյալի վերջին խոսքը լսելուն, երբ մեղադրող Արմեն Չիչոյանը միջնորդել է վերսկսել դատաքննությունը և նշանակել դատահոգեբանական փորձաքննություն՝ իրավախախտումը կատարելու պահին Կարինե Աբազյանի հոգեկան վիճակը պարզելու համար:
Ամբաստանյալ Աբազյանն ու տուժող Դավթյանը չեն առարկել: Դատարանը, գնահատելով արդարադատության շահը, բավարարել է մեղադրողի միջնորդությունը, վերսկսել դատաքննությունը և նշանակել դատահոգեբանական փորձաքննություն:
Ելնելով գործի հանգամանքներից՝ Կարինե Աբազյանի նկատմամբ դատահոգեբանական փորձաքննություն պետք է նշանակվեր դեռ նախաքննության փուլում: Բայց լավ է ուշ, քան երբեք: Հնարավոր է, որ դատահոգեբանի տված եզրակացությունը հիմք տա՝ ամբաստանյալի արարքը վերաորակելու, ճիշտ քրեաիրավական գնահատական տալու համար:
Կարինե Աբազյանը խոհանոցային դանակով երկու հարված է հասցրել և տուժողի առողջությանը պատճառել ծանր վնաս:
Աբազյանին մեղադրանք է առաջադրվել դիտավորությամբ տուժողի առողջությանը ծանր վնաս հասցնելու համար՝ ՀՀ քրեական օրենսգրքի 112 հոդվածի 1-ին մասով:
Տուժողը ոչ այլ ոք է, եթե ոչ՝ Կարինե Աբազյանի ամուսինը՝ Արմեն Դավթյանը:
Կարինե Աբազյանը, չխորանալով իրավաբանական ու հոգեբանական նրբությունների մեջ, իրեն մեղավոր է ճանաչել ամուսնու առողջությանը ծանր վնաս հասցնելու համար:
Նա Արմենի հետ ամուսնացել է 2000 թվականին: Համատեղ ամուսնական կյանքի ընթացքում ունեցել են մի տղա, մի աղջիկ: Երեխաներն անչափահաս են:
2008 թվականին Կարինեն ու Արմենն ամուսնալուծվել են, որոշ ժամանակ բնակվել առանձին: Սակայն հետագայում, ըստ երևույթին՝ հայկական՝ «հանուն երեխաների» սկզբունքի ճնշման տակ, նորից միացել են ու բնակվել համատեղ:
Բայց դեռ հարց է՝ դա հանո՞ւն, թե՞ ընդդեմ երեխաների է եղել, որովհետև ծնողների անվերջ վիճաբանությունները, հոր կողմից մորը ծեծելը, ապա և ներկայացվող հանցագործությունը տեղի են ունեցել երեխաների աչքի առաջ՝ նրանց հոգեկան ծանր ապրումներ պատճառելով ու անմոռանալի դառը հիշողություններ թողնելով:
Անչափահաս երեխաների ցուցմունքներով՝ ծնողները հաճախ են վիճաբանել, հայրը մշտապես ծեծի է ենթարկել իրենց մորը:
Ըստ Կարինեի՝ համատեղ կյանքի ընթացքում ամուսինը գրեթե չի աշխատել, չի հոգացել երեխաների կարիքները, ինչի պատճառով էլ իրենք անհաշտ են եղել, պարբերաբար վիճել են իրար հետ:
2012 թվականի դեկտեմբերի 29-ին Կարինեն տանն է եղել, ինչպես շատ հայ տանտիկիններ, զբաղվել է ամանորյա տոնական նախապատրաստություններով, որ ուրախացնի երեխաներին:
Ժամը 19-ն անց 30-ի սահմաններում տուն է եկել ամուսինը: Կարինեն նրանից պահանջել է երեխաների՝ նախորդ օրը ստացված նպաստի գումարը՝ գոնե անհրաժեշտ նվազագույն գնումները կատարելու համար:
Արմենը հրաժարվել է գումար տալուց: Նա գոռգոռացել է, անպատվել կնոջը, պահանջել է, որ կինը երեխաներին վերցնի ու հեռանա տնից:
Վիճաբանություն է սկսվել: Արմեն Դավթյանը հյուրասենյակում դրված աթոռը վերցրել ու երեխաների ներկայությամբ այնպես է հարվածել կնոջ մեջքին, որ աթոռը կտոր-կտոր է եղել:
«Հերոսական» ամուսինը դրանով չի բավարարվել, նա վերցրել է ջարդված աթոռի ոտքն ու դրանով հարվածներ հասցրել կնոջ գլխին ու մարմնի այլ մասերին:
Ցավից ու ապրումներից Կարինեն ուշագնաց է եղել: Նրա երեխաները ջուր են լցրել մոր վրա, որ ուշքի բերեն:
Երբ Կարինեն ուշքի է եկել, վազել է խոհանոց, վերցրել խոհանոցային դանակն ու վազել դեպի ամուսինը:
Արմենն այդ ժամանակ կանգնած է եղել միջանցքում: Կարինեի հարձակմանը նա չի սպասել, երևի սովորական է եղել անմռունչ կնոջը ծեծելն ու «փառավորված»՝ տանը շրջելը:
Այս անգամ Կարինեի մեջ ինչ-որ բան տակնուվրա է եղել: Նա դանակը ձեռքին հարձակվել է, դանակով հարվածել ամուսնու որովայնին: Որդու ներկայությամբ: Դուստրը փախել էր ննջարան: Իսկ անչափահաս տղան տեսել է դանակի հարվածները, արյունը, լսել է, թե ինչպես է հայրը բղավում:
Կարինեն չի հիշում, թե քանի հարված է հասցրել ամուսնուն: Կնոջ ուշագնացությունը, հիշողության կորուստը, տևական ժամանակ ճնշվածի ու ծեծվողի հոգեվիճակում գտնվելը կարող են ֆիզիոլոգիական աֆեկտի վիճակի մասին վկայել, ահա թե ինչու է անհրաժեշտ ամբաստանյալի նկատմամբ դատահոգեբանական փորձաքննության կատարումը:
Ըստ քրեական գործի՝ Կարինեն սկզբում հարվածել է ամուսնու որովայնի ձախ հատվածին, հետո կրծքավանդակի հետին մակերեսին:
Այս անգամ էլ Արմենն է ընկել: Կարինեն ու անչափահաս որդին օգնել են, նրան ոտքի կանգնեցրել, նստեցրել են բազկաթոռին:
Այնուհետև տեսնելով, որ ամուսնու վիճակը վատանում է, Կարինեն նրան տեղափոխել է հիվանդանոց:
Արմեն Դավթյանի կյանքը փրկվել է:
Կարինե Աբազյանի նկատմամբ խափանման միջոց է ընտրվել չհեռանալու մասին ստորագրությունը:
Դատահոգեբանական փորձաքննության ավարտից ու եզրակացության ստացումից հետո դատաքննությունը կշարունակվի: