Ազգային ժողովում շարունակվում են 2012 թ. կառավարության գործունեության վերաբերյալ ՎՊ նախագահ Իշխան Զաքարյանի ներկայացրած հաշվետվության քննարկումները:
Հաշվետվությանն անդրադառնալով՝ ՀՅԴ խմբակցության ներկայացուցիչ Արծվիկ Մինասյանն ասաց, թե ի վերջո կա՞ գնահատական, թե ստուգումների արդյունքում որքա՞ն վնաս է հասցվել ՀՀ-ին: Նա նշեց, որ անցել է տարիուկես, երբ հայտարարվել են այս խախտումների մասին և, ըստ էության, կառավարությունն էլ չի առարկել, այս ընթացքում բյուջե է կազմվել: «Այս խախտումները հաշվի առնվե՞լ են, ռիկսերը հաշվի՞ են առնվել, չեզոքացվե՞լ են: Կուզեմ ասեք, թե 2011 թվականից որքան շեղում է եղել ԱԺ-ում հաստատվածի և կառավարության իրականացրածի միջև: Քաղաքաշինության ոլորտի վերաբերյալ այնպիսի մեղադրանք է հնչել, որ պետք է նախարությունն արդեն փակված լիներ, բայց տեսնում ենք, որ փակված չէ: ՎՊ-ն այդ նախարարությունում չի եղել: Նախարարությո՞ւնն է մեղավոր, թե՞ կատարող շինարարն այդ խախտումների համար»,- նման հարց ուղղեց արծվիկ Մինասյանը:
Ի պատասխան՝ Իշխան Զաքարյանն ասաց, որ 2012 թ. ՎՊ-ն նախարարությունում ստուգում չի իրականացրել, իսկ իրենք, ասելով քաղաքաշինության ոլորտ, նկատի են ունեցել ողջ ոլորտը և ոլորտում աշխատող երեք հանձնախմբերին: Ըստ ՎՊ նախագահի՝ սկսած ավելի վաղ ժամանակներից մինչև վերջին բոլոր նախարարների հրամանները, բացի այսօրվա գործող նախարարից, «ինչ ասես կա, պետք է հասկանալ, թե ինչ է կատարվում այս բնագավառում»:
«Որտե՞ղ է այդ ատկատը, այդքան խոսում ենք: Շատ ավելի քիչ ենք տեսնում, տեղափոխվել է ավելի խրթին բնագավառներ, ավելի նուրբ ձևով են քաշում այդ գումարները պետբյուջեից: Տարիներով կուտակված խնդիրներ են եղել, դրանք պետք է շտկենք: Սրանք խնդիրներ են, որոնք պետք է լուծվեն, եթե իշխանությունը համարձակ մտել է այս դաշտ, պետք է լուծի: Համոզված եմ, որ մի օր՝ որոշ ժամանակ անց, հիմնական թիրախները լուծվելու են»,- այսպես պատասխանեց Արծվիկ Մինասյանին Իշխան Զաքարյանը:
Արձագանքելով՝ Մինասյանն ասաց, որ իշխանությունը համարձակ մտել է, բայց չի լուծում: «2012 թ. պետբյուջեի շուրջ 100 ծրագիր խեղումներով է տեղի ունեցել, երբ 37 մլրդ դրամի փոփոխություն է իրականացնում, իսկ դրա իրավունքը չունի: Չարիքի առանցքը անպատասխանատու վերաբերմունքն է սեփական բյուջետային միջոցների նկատմամբ»,- ասաց նա: Արծվիկ Մինասյանի այս խոսքերին Իշխան Զաքարյանը չարձագանքեց:
