Հայաստանի գերմանական համալսարանում նոյեմբերի 10-ին «Ինչ ասել է մտածել» դասախոսությամբ հանդես եկավ ավելի քան քսան տարվա կրթական գործունեության փորձ ունեցող դոկտոր Մարտին Էռնստ Կրաուսը: Դոկտոր Կրաուսից, որն անցյալ տարի եւս եղել էր Հայաստանում եւ հանդես եկել դասախոսությամբ, «Առաջին լրատվականը» հետաքրքրվեց, թե մշակութային ինչ ընդհանրություններ եւ տարբերություններ է նկատել հայերի եւ գերմանացիների միջեւ: «Հայաստանում ես հայտնաբերել եմ զարգացած սրտի մշակույթ: Մինչդեռ` Գերմանիայում մտավոր, ինտելեկտուալ մշակույթն է զարգացած: Իմ հոգում արձագանքում են Հայաստանի հին եկեղեցիները: Ես այն վերապրումն եմ ունեցել, որ դարերի ընթացքում Հայաստանում եկեղեցիների կառուցումը, հոգեւոր զարգացումն ուղեկցում է հայ ժողովրդին: Դրանցում կա առանձնահատուկ մի ուժ»,- մեր զրույցի ժամանակ նշեց Մարտին Էռնստ Կրաուսը:
