Շուշիի քաղաքապետ Արծվիկ Սարգսյանը «Առաջին լրատվական»-ի հետ զրույցում նշեց, որ 1992 թվականից սկսած՝ Շուշիում բավականին փոփոխություններ են կատարվել, և այս պահի դրությամբ ավերված շենքերի 60-70 տոկոսը, կարելի ասել, վերականգնված է. «Գործում են բոլոր դպրոցները, մանկապարտեզները, մշակութային օջախները: Շուշի են տեղափոխվել մշակույթի նախարարությունը, Ագրարային համալսարանի մասնաճյուղը»:
Ինչպես նշեց քաղաքապետը՝ ժողովուրդը բավականին աճել է քաղաքում՝ «երևի մոտ մի 400 շունչ կա: Մարդիկ տրամադրված են վերադառնալ իրենց հողը և կառուցել իրենց բնակարանները»:
Շուշիի քաղաքապետը շնորհավորեց հայ ազգին, զինվորներին, որդեկորույս մայրերին. «Նրանց առաջ գլուխ եմ խոնարհում ու ասում՝ Շուշին դարեդար լինելու է հայկական: Այս հողը, այս ջուրը պիտի միայն ու միայն հայը վայելի, քանի որ այսօր հենց մեզ է բախտ վիճակվել ազատագրել ու ապրել Շուշիում»:
