Ամերիկյան The Wall Street Journal պարբերականի փոխանցմամբ` Սաուդյան Արաբիան կորցնում է Ասիայում նավթի գլխավոր մատակարարի տիտղոսը: Նավթարդյունաբերության նախարարի պաշտոնից Ալի ալ Նաիմիի հեռացումը, որն այդ պաշտոնը զբաղեցնում էր 1995 թվականից, Ռուսաստանի և Իրանի հետ Սաուդյան Արաբիայի մրցակցությունը շարունակում է սպառնալ նրա նավթի հաջող արտահանմանը Չինաստան, Ճապոնիա ու Հնդկաստան:
Վերջին երկու տարում նավթի գների կտրուկ անկումը և մրցակցությունը նշանավորեցին այն բարդությունները, որոնց ալ-Նաիմին ստիպված եղավ բախվել իր պաշտոնում:
Չինաստանն իր համար անհրաժեշտ նավթի մեծ մասը ստանում է Սաուդյան Արաբիայից: Եվ այնուամենայնիվ, վերջին մեկ տարում 10.6 տոկոսով աճել է Ռուսաստանից Չինաստան նավթի ներկրման ծավալը: Աշխարհագրական դիրքը Ռուսաստանը դարձնում է ավելի մրցունակ երկիր ասիական նավթային շուկայում: Բացի դրանից՝ ռուսական «Գազպրոմը» չինացի գնորդներին թույլատրել է ռուսական նավթի համար վճարումներ իրականացնել յուանով և ոչ թե դոլարով:
Սաուդյան Արաբիան կորցնում է իր մասնաբաժինը նաև Ճապոնիայի նավթային շուկայում: 2015 թվականի մարտից անկումը կազմել է գրեթե 4 տոկոս: Ընդ որում` Ռուսաստանի մասնաբաժինն աճել է 1 տոկոսով:
Ռուսաստանի և Սաուդյան Արաբիայի մրցակցությունը սրում է նաև Հնդկաստանի շուրջ իրավիճակը, ուր ակնկալվում է նավթի պահանջարկի աճ: Ընդ որում` այստեղ մրցակցությանը միացել է Իրանը, որի դեմ պատժամիջոցները վերացվել են: Իրանը հետաքրքրված է ասիական նավթային շուկայով, և նրա ակտիվությունը կարող է նվազեցնել Ասիայի նավթային շուկաներում մյուս երկրների դերը:
