Հունիսի 15-ին «Ժառանգություն» կուսակցությունն իր անդամների, աջակիցների ու հանրության համար կանցկացնի բաց հանդիպում՝ նրանց դատին հանձնելու իր անցյալ և ապագա գործունեությանն առնչվող ներկայացուցչական ելույթները: Հանդիպումը տեղի կունենա ժամը 13:00-ին Հայաստանի գրողների տան մեծ դահլիճում: Այս մասին «Առաջին լրատվական»-ին հայտնում են «Ժառանգություն» կուսակցության լրատվական ծառայությունից:
Միջոցառման ընթացքում հաշվետու ելույթներով հանդես կգան նախագահ Րաֆֆի Կ. Հովհաննիսյանը, վարչության փոխնախագահ Արմեն Մարտիրոսյանը, խորհրդարանական խմբակցության ղեկավար Ռուբեն Հակոբյանը, Երևան քաղաքի ավագանու «Բարև Երևան» խմբակցության ղեկավար Անահիտ Բախշյանը, կուսակցության միջազգային քարտուղար Ստեփան Սաֆարյանը, Ազգային ժողովի պատգամավոր, իրավաբան Զարուհի Փոստանջյանը, մամլո խոսնակ Հովսեփ Խուրշուդյանը, Երևանի ավագանու անդամ Դավիթ Սանասարյանը, «Ժառանգության» երիտասարդական թևի պատասխանատուները և կուսակցության այլ ներկայացուցիչներ:
Այս հանրային հաշվետվությունների ներկայացմանը նույն օրը ժ. 14:00-ին կհաջորդի «Ժառանգություն» կուսակցության համապետական քաղաքական խորհրդի փակ նիստը, որի ընթացքում կքննարկվեն Հայաստանի և հայ ժողովրդի առջև ծառացած մարտահրավերները: «Ժառանգություն» կուսակցության տասներորդ համագումարը, որը նախապես ծրագրվել էր անցկացնել նույն օրը, կգումարվի ավելի ուշ՝ կապված վերջին պահին Կառավարության նիստերի դահլիճի զբաղվածության հետ:
