Գլխավոր դատախազության շենքի դիմաց оրեր շարունակ իրենց բողոքի ձայնն են բարձրացնում Կոտայքի մարզի Աղավնաձոր գյուղից եկած Դանիելյանների ընտանիքի անդամները, ովքեր պահանջում էին տեսակցություն ՀՀ գլխավոր դատախազ Աղվան Հովսեփյանի հետ: Նրանց պահանջը մեկն է՝ 2008 թվականին տեղի ունեցած ավտովթարի վերաբերյալ դատարանում արդարացի վճիռ կայացնել:
Դանիելյանների ընտանիքից Մկրտիչ Դանիելյանը 2008 թվականի հոկտեմբերի 25-ին Աղավնաձորից Հրազդան գնալու ճանապարհին գտնվել է «Մերսեդես-Բենց Ե 320» մակնիշի ավտոմեքենայում, որը վթարի է ենթարկվել՝ բախվելով «Վազ 21-06» մակնիշի մեկ այլ մեքենայի, ինչի հետևանքով երկու հոգի զոհվել են, երկուսը՝ վիրավորվել՝ Մկրտիչ Դանիելյանը և «Մերսեդեսի» տերը՝ Գագիկ Հովսեփյանը:
Ըստ անցկացված չորս փորձաքննությունների արդյունքներից երեքի՝ Մկրտիչ Դանիելյանը նստած է եղել վարորդի կողքին, իսկ մեկում ասվում է, որ երկուսն էլ կարող էին ղեկին եղած լինել, ավելի մեծ է հավանականությունը, որ Մկրտիչ Դանիելյանն է եղել վարորդը:
«Առաջին լրատվական»-ի հետ զրույցում Մկրտիչն ասաց, որ վթարի ժամանակ ինքը վարորդի կողքի աջ նստատեղից դուրս է շպրտվել տասը մետր և հիվանդանոցում յոթ օր եղել է կոմայի մեջ: Այդ ընթացքում հարցաքննվել է Գագիկ Հովսեփյանը, ով հաստատել է, որ ղեկին է եղել: Սակայն միայն առաջին երկու ցուցմունքներում է դա խոստովանել, դրանից հետո նրա բոլոր ցուցմունքներում ասվում է, որ ինքը ղեկին չի եղել: Դատախազ Հակոբ Մարտիրոսյանը՝ հիմնվելով այն փորձաքննության և մեղադրող կոմղմերի վկայությունների վրա, եկել է այն եզրակացության, որ երկուսն էլ կարող էին ղեկին եղած լինել, արդարացրել է Գագիկ Հովսեփյանին և մեղավոր ճանաչել Մկրտիչ Դանիելյանին:
Դատարանում արդեն ընթերցվել է վերջնական ճառը, գործը գտնվում է վերջնական՝ երրորդ փուլում, մեղադրող կողմը պահանջում է 7 տարվա ազատազրկում:
Նշենք, որ մահացողներից մեկը ընտանիքի մինուճար որդի է, մյուսը՝ նրա մորեղբայրը: «Առաջին լրատվական»-ը զրուցեց նաև Հակոբ Մարտիրոսյանի հետ, ով մանրամասն ներկայացրեց գործը, ասաց, որ մեղադրող կողմի վր սպառնբալիքներ են եղել, Դանիելյաններն անգամ իրեն կաշառք են առաջարկել, որը չի վերցրել և դրա համար էլ Դանիելյանները կենտրոնացել են իր անձի վրա:
Ինչ վերաբերում է դատախազություն մտնելուն, ապա Դանիելյանների ընտանիքից ներս թողեցին միայն Մկրտիչ Դանիելյանին, ում պատասխանել էին, թե հիմա արդեն ուշ է, վճիռը կայացնելուց հետո կդիմեք Վճռաբեկ դատարան:
Պատասխանն իրարանցում առաջացրեց դրսում, ընտանիքը չի ուզում սպասել, մինչև նոր հնարավորություն ունենան Վճռաբեկ դատարանին դիմելու: Նրանք հայտարարեցին, որ գնալու են մինչև վերջ, Աղվան Հովսեփյանի հետ հանդիպելու համար դիմում գրեցին, իրենց խոսքով՝ պետք լինի՝ նստացույց էլ կանեն:
Հավելենք, որ դեպքի վերաբերյալ «Առաջին լրատվական»-ն անցկացնում է լրագրողական հետաքննություն, շուտով կներկայացնենք դեպքի հետ կապված երկու կողմերի տեսակետերն էլ:
