Երիտասարդական հիմնադրամի Գյումրիի մասնաշենքը բացելու համար նախօրեին Գյումրի է գնացել նաև ՀՀԿ փոխնախագահ Արմեն Աշոտյանը: Թե ի՞նչ կապ ունի ՀՀԿ փոխնախագահը պետբյուջեի ֆինանսներով գործող հիմնադրամի հետ՝ առայժմ հայտնի չէ: Փաստ է, որ ՀՀԿ-ականները չեն խորշում ցուցադրել իրենց ազդեցությունը պետբյուջեի ֆինանսներով գործող այդ հիմնադրամի վրա:
Այցի ընթացքում, մեզ հասած տեղեկություններով, Աշոտյանը հանդիպել է Շիրակի ՀՀԿ կառույցի հետ ու որոշ փակագծեր բացել Գյումրիի քաղաքապետի ընտրությունների առթիվ: Մասնավորապես՝ ասել է, որ ՀՀԿ-ն որոշել է սեփական ցուցակով մասնակցել հոկտեմբերին Գյումրիում ավագանու ընտրություններին և սեփական թեկնածու ունենալ: Ըստ այդմ՝ ՀՀԿ թեկնածուն պետք է անպայման ՀՀԿ-ական լինի: Այսինքն՝ նախկին ԲՀԿ-ականներ Մարտուն Գրիգորյանը կամ Սամվել Բալասանյանը, որպես անկուսակցականներ, չեն կարող ներառվել ՀՀԿ համամասնական ցուցակում ու մասնակցել Գյումրիի քաղաքապետի ընտրություններին:
Հոկտեմբերին Գյումրիում տեղի կունենան ՏԻՄ ընտրություններ, քանի որ գործող քաղաքապետ Սամվել Բալասանյանի պաշտոնավարման ժամկետն ավարտվում է: Արդեն իսկ առաջադրվելու ցանկություն են հայտնել գործող քաղաքապետ Սամվել Բալասանյանը, ԱԺ պատգամավոր, գյումրեցի Մարտուն Գրիգորյանը, «Հայկական վերածնունդ»-ից Հովհաննես Մարգարյանը, Գյումրիի նախկին քաղաքապետ Վարդան Ղուկասյանը ևս կարող է մասնակցել, ինչպես նաև արդարադատության նախկին նախարար Հովհաննես Մանուկյանը:
Մեզ հասած տեղեկություններով՝ Արմեն Աշոտյանը Գյումրիի ակտիվի հետ հանդիպման ժամանակ ասել է, որ ՀՀԿ-ն քաղաքապետի պաշտոնում որոշել է առաջադրել ՀՀԿ Շիրակի մարզային կառույցի ղեկավար Սահակ Մինասյանի թեկնածությունը: Այդ առթիվ մի քանի հարց ուղղեցինք նրան:
– Պարոն Մինասյան, մենք տեղեկություն ունենք, որ Արմեն Աշոտյանը երեկ Գյումրիում ասել է, որ Գյումրիի քաղաքապետի ընտրություններում ՀՀԿ թեկնածուն Դուք եք լինելու: Սա Ճի՞շտ է:
– Չէ՛, ասեմ ձեզ: Արմեն Աշոտյանը հստակ ասել է, որ մենք ուզում ենք, որ ՀՀԿ-ն մասնակցի ավագանու ընտրություններին առանձին կուսակցական ցուցակով, իսկ թեկածուի մասին պարոն Աշոտյանն ասել է, որ կլինի քաղաքական որոշում և կորոշվի: Դեռևս քաղաքական որոշում չկա: Առայժմ անձերի խնդիր չի հրապարակվում:
– Ուզում եք ասել՝ ՀՀԿ-ն որոշում է կայացրել մասնակցել Գյումրիի ընտրություններին առանց թեկնածուի՞:
– ՀՀԿ-ն մասնակցում է ընտրություններին սեփական ցուցակով: Ով կղեկավարի ցուցակը, դա հարցի 2-րդ մասն է, որի վերաբերյալ կլինի քաղաքական որոշում:
– Իսկ ովքե՞ր են ՀՀԿ-ի թեկնածուները, եթե Դուք չեք:
– Ես չասեցի՝ ես չեմ, ասեցի՝ ես ոչ մի խնդիր չեմ կարող Ձեզ հստակ պարզաբանել: Թեկնածուներ կան: Մենք բավականին կիրթ, համակողմանի զարգացած կուսակցական համակազմ ունենք Գյումրիում, էնպես որ՝ ընտրության հնարավորությունը փոքր չի:
– Ասել է թե՝ քաղաքապետի անկուսակցական թեկնածուները, օրինակ՝ Մարտուն Գրիգորյանը կամ Սամվել Բալասանյանը չե՞ն կարող լինել ՀՀԿ ցուցակում:
– Այո՛: Փոխնախագահի հայտարարությունը տարավ դրան: Բառացի ասվեց՝ զուտ հանրապետական:
– Ձեր կամ ՀՀԿ այլ թեկնածուի ընտրվելու հավանականությունն ինչպե՞ս եք գնահատում՝ հատկապես Գյումրիում ՀՀԿ-ի պարտությունների շարքից հետո:
– Պարտությունների շարք ասածը ես չեմ ընդունում, քանի որ ՀՀԿ-ն պարտությունների շարք չի ունեցել ընդհանրապես: Եղել է, որ հանրապետականը ընդամենը մի անգամ քվեների թվով զիջել է ԲՀԿ-ին:
– ՀՀԿ նախագահ Սերժ Սարգսյանն էլ զիջել է «Ժառանգության» նախագահ Րաֆֆի Հովհաննիսյանին:
– Նախագահի ընտրություններում էլ է մի անգամ եղել նման խնդիր: Հիմա ՀՀԿ-ն բավականին առողջ լրակազմով համալրված է, բավականին մարտունակ թիմ է՝ իր պոտենցիալով, իր ինտելեկտուալ կարողություններով: Ոչ մի կուսակցություն այսօր Գյումրիում ավելի բարձր վարկանիշ չունի:
– Ստացվում է՝ ՀՀԿ-ն այսօր մտադիր է վերագրավել Գյումրին՝ թերևս Ձեր միջոցով:
– Ի՞նչ է նշանակում՝ վերագրավել Գյումրին: Գյումրիի տերը գյումրեցին է և մեր պետականությունը:
– Սակայն նույն գյումրեցին բազմիցս մերժել է իշխանությանը, մասնավորապես՝ ՀՀԿ-ին:
– Նույն գյումրեցին բազմիցս սատար է կանգնել իշխանությանը ցանկացած քաղաքական, տնտեսական խնդիր լուծելուց: Գյումրիում ընտրվելիք քաղաքապետը բոլոր գյումրեցիների քաղաքապետն է լինելու:
– Եթե մաքուր ընտրություններ լինեն, արդյոք Դուք շանսեր ունե՞ք ընտրվելու:
– Բոլորս պետք է հակված լինենք, որ անցկացնենք իր տեսակով եզակի ընտրություններ՝ առանց որոշակի լծակների կամ ռեսուրսների և տոնենք հաղթանակ: Համոզված եմ, որ ոչ մի պետական պաշտոնյա ռեսուրս չի օգտագործելու, որ մենք ունենանք անկողմնակալ, իրական ընտրություններ:
– Իսկ եթե ՀՀԿ-ի թեկնածուն պարտվի, դա Ձեզ համար ընդունելի կլինի՞:
– Ում կընտրի ժողովուրդը՝ նա էլ կլինի Գյումրիի քաղաքապետը:
