ՀԺԿ փոխնախագահ, ծնունդով Մեղրիից Գրիգոր Հարությունյանը կարծում է, որ Սյունիքի նոր մարզպետին պետք է ընտրի ժողովուրդը: Նա «Առաջին լրատվական»-ի հետ զրույցում կարծիք հայտնեց, որ ում էլ նշանակեն Սյունիքի մարզպետ, միևնույն է, փոփոխություն չի լինի: Ըստ նրա՝ անհրաժեշտ է համակարգային փոփոխություն. «Նախ ի՞նչ է նշանակում մարզպետ նշանակել, մարզպետին պետք է ժողովուրդն ընտրի, հետո՝ ում ուզեն, նրան էլ կնշանակեն, ոնց ասեն, այնպես էլ կաշխատի»։
Մեր այն հարցին, թե գուցե նոր մարզպետ նշանակելու դեպքում, վախի մթնոլորտը վերանա՞ Սյունիքում, Գ․ Հարությունյանը պատասխանեց. «Երևանում ինչ է վախի մթնոլորտ չկա՞, ի՞նչ տարբերություն՝ Սյունիք, Գյումրի, բոլոր տեղերն էլ վախի մթնոլորտ է։ Օրինակ՝ Երևանի բնակիչները թաղային հեղինակությունների մոտ էլ չեն կարող բարձրաձայնել խնդիրներ: Սա համակարգային իրավիճակ է, պետք չէ առանձնացնել, դուրս է գալիս սյունեցիները վախկոտ են, բայց ոչ՝ բոլորից էլ համարձակ են, թեկուզ հենց Կապանում ժողովուրդը «ոչ» ասեց Սերժ Սարգսյանին։ Դա նշանակում է վախի մթնոլորտ ընդհանուր կա, սյունեցիները վախկոտ չեն»:
Մեր զրուցակցը հավելեց, որ Հայաստանը միայն Սյունիքը չէ, և մինչև Հայաստանում չլինեն ժողովրդավարական ընտրություններ, ժողովրդի կողմից չձևավորվի իշխանություն՝ ոչինչ չի փոխվի. «Մեկ ուրիշը կլինի՝ խնդիր կդնեն նրա առջև։ Մի քիչ այլ դիմակով կամ մի քիչ այլ տեսքով՝ կանի այն, ինչ կհանձնարարվի վերևից»:
