2015 թվականին ողջ աշխարհում զինված հակամարտությունների զոհ է դարձել մոտ 167 հազար մարդ։ Զոհերի ընդհանուր թվից 1/3-ը բաժին է ընկել սիրիական հակամարտությանը՝ վկայում են զեկույցի տվյալները, որը պատրաստել է Ռազմավարական հետազոտությունների ամերիկյան միջազգային ինստիտուտի (IISS) լոնդոնյան բաժանմունքը։ Այս մասին փոխանցում է RIA Novosti-ն։
Ինստիտուտի տվյալներով՝ 2014 թվականին ողջ աշխարհում հակամարտության զոհ է դարձել 180 հազար մարդ։
«Զոհերի 1/3-ը բաժին է ընկնում Սիրիայում հակամարտությանը, որտեղ զոհերի թվի աճը կազմել է 55 հազար։ Դա ցածր է, քան 2014 թվականին, սակայն այդ ցուցանիշը նախկինի պես գտնվում է Մերձավոր Արևելքում և Հյուսիսային Աֆրիկայում բոլոր զոհվածների թվի 66 տոկոսի մակարդակի վրա»,- ասվում է զեկույցում։
Փորձագետները փաստում են Աֆղանստանում հակամարտության զոհերի թվի կտրուկ աճ, որտեղ IISS-ի տվյալներով՝ 2015 թվականին զոհվել է 15 հազար մարդ, մինչդեռ 2013-ին, երբ անվտանգության ապահովմանն օգնել է ISAF-ի միջազգային զորակազմը, զոհերի թիվը կազմել է 3500։
«Ընդհանուր առմամբ 6 հակամարտություններին՝ Սիրիայում, Իրաքում, Կենտրոնական Ամերիկայում, Մեքսիկայում, Աֆղանստանում և Նիգերիայում, բաժին է ընկնում զոհերի ընդհանուր թվի 80 տոկոսը»,- ասվում է փաստաթղթում։
Զեկույցի հեղինակները փաստել են փախստականների և հարկադիր տեղահանվածների թվի աճ՝ 2013-ի 33 միլիոնից արդեն 2015-ի կեսերին այն հասել է 46 միլիոնի։
