Էկոնոմիկայի նախարարությունն իրականացնում է ուսումնասիրություն թուրքական այն ապրանքների մասով, որոնք հիմնականում որակով սպառնում են Հայաստանի տնտեսությանը և տեղական արտադրողի հետ մրցակցություն ստեղծում շուկայում։
Հայաստանի կառավարությունը որոշել է արգելել հայկական տեղական շուկայում թուրքական արտադրության ապրանքների վաճառքը։ Կառավարության համոզմամբ՝ բացը կլրացնի ԵՏՄ շուկան։
Մանրածախ շուկայում մասնավոր վաճառականների՝ առանց բացառության բոլորի սեղանին դրված են Made in Turkey մակնշմամբ հագուստ, կոշիկ, տնտեսական ապրանքներ։ Առաջարկվող ապրանքների հիմնական տեսականին հենց Թուրքիայից է։ Տեղացի արտադրողներն ու վաճառողները պարզապես չեն պատկերացնում շուկան՝ առանց թուրքական արտադրության ապրանքի։
Վաճառականները շեշտում են, որ գնորդները Թուրքիայից ներկրված ապրանքներից նախընտրում են տեղական արտադրանքը, բայց դա հազվադեպ հանդիպող երևույթ է։
Կոշիկ վաճառողներից շատերը Հայաստանում կոշկակարներ են։ Նրանք վաճառում են իրենց իսկ արտադրանքը, թեև Made in Armenia մակնշմամբ կոշիկի հումքը նույնիսկ Թուրքիայից են բերում։
Թուրքական արտադրանքի վրա դրվող արգելքը կհարվածի տեղական շուկային։ Թուրքիայից ապրանք ներմուծողները հոռետեսական սցենարներ են նկարագրում. շուկան կսկսի սպառողին չբավարարել, գները կթանկանան. օրինակն աչքների առջև է:
Թուրքական ապրանքի դեմ պատժամիջոցները պետք է լինի Made in Turkey-ից Made in Armenia անցումով։ Առևտրականներն առաջարկում են զարկ տալ տեղական արտադրությանը և փակված գործարանները վերագործարկել: